कोरोना भाइरस परीक्षणको निम्ति दुई जना टेकु अस्पतालमा भर्ना

राजधानीको शुक्रराज ट्रपिकल तथा सरुवा रोग अस्पतालमा कोरोना भाइरस परीक्षणको निम्ति शंकास्पद दुई व्यक्ति भर्ना भएका छन् । चीनबाट नेपाल फर्किएका ती व्यक्तिलार्ई कोरोना भाइरस परीक्षणको निम्ति बुधबार टेकुस्थित शुक्रराज ट्रपिकल अस्पतालको आइसोलेशन बेडमा भर्ना गरिएको हो ।

आवश्यक परिक्षणपछि मात्र उनीहरुको स्वास्थ्य स्थितिबारे बोल्न सकिने स्रोतले जनाएको छ । कोरोना भाइरसको व्यापक त्रास फैलिरहेको सन्दर्भमा चीनबाट फर्केका उक्त दुई व्यक्तिलाई परीक्षणको निम्ति अस्पतालमा भर्ना गरिएको हो ।

भाइरसले विश्वभर त्रास फैलाइरहेको अवस्थामा नेपालमा पनि यसको संक्रमण एकजनामा देखिएपछि यसको त्रास झनै फैलिएको छ । सोमबार आशंका गरी परीक्षण गरिएका अन्य दुई जनामा भने सकरात्मक रिपोर्ट देखिएपछि घर फर्काइएको थियो । यसअघि भाइरस परीक्षणका निम्ति हङकङ पठाइएता पनि गत सोमबारदेखि यसको परीक्षण नेपालमा नै शुरु भएको छ ।

प्राप्त तथ्यांक अनुसार हालसम्म यसबाट मृत्यु हुनेको संख्या चीनमा १३२ पुगेको छ । नेपालमा पनि यसको संक्रमण देखिएपछि यसका निम्ति सरकारले जनचेतनाका कार्यक्रम संगसँगै उच्च सर्तकता अपनाउँदै आएको छ ।