काठमाडौं–कोभिड–१९ को दोस्रो लहर तीब्र रुपमा फैलिएसँगै देशभरका अस्पतालहरुमा आईसीयु र भेन्टिलेटरको अभाव भइरहेको छ । देशका अन्य अस्पतालहरुमा बेड र भेन्टिलेटरको अभाव भएपछि गम्भीर कोभिड–१९ का संक्रमित झापास्थित प्रस्तावित बीएण्डसी शिक्षण अस्पतालमा एयर लिफ्टमार्फत पुग्ने क्रम बढेको छ ।
अस्पतालका कार्यकारी निर्देशक दुर्गा प्रसाईकाअनुसार अहिलेसम्म देशका विभिन्न भागमा भेन्टिलेटरको अभाव भएपछि २२ जना गम्भीर कोभिड–१९ संक्रमितलाई एयर लिफटमार्फत बीएण्डसी लगिएको छ ।
‘प्रदेश नं. १ का साथसाथै नेपालगन्ज, मुगु, डोटी, कैलाली, दाङ, चितवन, ओखलढुंगा, वीरगंज, पोखरा, सोलुम्बु र काठमाडौंलगायतका स्थानबाट गम्भीर कोभिड–१९ संक्रमितहरु उपचार लागि एयर लिफ्ट गरेर बीएण्डसी आएका छन्,’ प्रसाईले भने, ‘हालसम्म २२ विभिन्न ठाउँबाट एयर लिफ्ट गरेर आएका २२ जना संक्रमितको आईसीयु, एचडियु र कोभिड वार्डमा उपचार भइरहेको छ ।’
बिरामीको विश्वासमा बीएण्डसी डटिरहेको बताउँदैं उनले एयर लिफ्ट गरेर आएका गम्भीर संक्रमितहरु निको हुने क्रममा रहेको बताए ।
बीएण्डसीले २ सय बेड कोभिड–१९ का बिरामीलाई छुट्याइको छ । जसमध्ये ७० आईसीयु बेड र ६५ वटा भेन्टिलेटरबाट कोभिड–१९ संक्रमित बिरामीको उपचार भइरहेको प्रसाईले बताए ।
