ललितपुर—सानेपा–२ स्थित स्टार अस्पतालले नुवाकोटको विदुरस्थित ढुंगे–१ मा ‘स्टार नुवाकोट अस्पताल’ संचालनमा ल्याएको छ । उपत्यका बाहिर बसोबास गर्ने नागरिकलाई सरल र सुलभ दरमा विशेषज्ञ सेवामा पहुँच विस्तार गर्ने योजनाअनुसार अस्पताल १५ बेड बाट ५० बेडमा स्तरोन्नती गरेर संचालन ल्याएको अस्पताले जनाएको छ ।
स्टार अस्पताल सानेपाका कार्यकारी अध्यक्ष किशोर कुमार मर्हजनले औपचारिक उद्घाटन गरेसँगै स्टार नुवाकोट अस्पताल संचालनमा आएको हो । सो क्रममा अध्यक्ष मर्हजनले ५० बेडको अस्पताल सञ्चालनमा आएसँगै नुवाकोट, धादिङ र रसुवाका ३ लाखभन्दा बढी जनसंख्याले लाभ लिन सक्ने विश्वास व्यक्त गरे ।
स्टार अस्पतालका मेडिकल डाइरेक्टर डा. शैल रुपाखेतीले स्टार नुवाकोट अस्पताल एउटा नाफामूलक संस्था मात्रै नभएर स्वास्थ्य सेवामा छुट्टै पहिचान बनाएको संस्था भएको बताए । स्टार अस्पताल सानेपामा सबै खालका विशेषज्ञ सेवा नियमित उपलब्ध भइरहेको भन्दै नुवाकोटका जनताको लागि पनि विशेषज्ञ सेवा उपलब्ध गर्नका लागि स्टार नुवाकोट अस्पताल संचालनमा ल्याएको उनको भनाइ थियो ।
कार्यक्रममा नुवाकोट जिल्लाका विभिन्न संघ, संस्थामा आवद्ध गन्यमान्य व्यक्तिहरुको सहभागिता रहेको थियो । स्टार नुवाकोट अस्पतालले उद्घाटनको उपलक्ष्यमा ४ दिने निःशुल्क विशेषज्ञ स्वास्थ्य शिविरसमेत आयोजना गरेको छ ।
