काठमाडौं—कपुण्डोलस्थित खड्गी इन्स्टिच्युट अफ युरोलोलीले २७ जनाको निःशुल्क पत्थरीको शल्यक्रिया गरेको छ । शुक्रबार इन्स्टिच्युट अफ युरोलोजीले पत्रकार सम्मेलन गरेर उक्त जानकारी दिएको हो ।
इन्स्टिच्युटका प्रबन्ध निर्देशक डा. संजय खड्गीले सर्वसाधारणको सहज उपचार पहुँचका लागि निःशुल्क शल्यक्रिया शिविर सञ्चालन गरेको बताए । ‘शल्यक्रिया गर्ने खर्च नभएका देशका विभिन्न भागका नागरिकका लागि हामीले निःशुल्क शल्यक्रिया शिविर गर्दै आएका छौं,’ उनले भने, ‘त्यसै क्रममा १८, १९ र २० फागुनमा हामीले २७ जनाको निःशुल्क पत्थरीको शल्यक्रिया गरेका छौं ।’
शल्यक्रिया गरिएका बिरामी देशका विभिन्न भागबाट आएको उनले जानकारी दिए । डा. खड्गीले आगामी दिनमा पनि आफूहरुको यो अभियान नियमित जारी रहने बताए । निःशुल्क शल्यक्रिया कुवेतस्थित रेड क्रेसेन्ट सोसाइटी अफ कुवेतसँगको सहकार्यमा गरिएको हो ।
यसअघि पनि धनगढीमा सोही संस्थाको सहयोगमा निःशुल्क शल्यक्रिया शिविर सञ्चालन गरिएको जानकारी सम्मेलनमा दिइएको थियो ।
इन्स्टिच्युटले गरिब बिरामीका लागि दैनिक सरकारी अस्पतालकै रेटमै ४ जनाको शल्यक्रिया गर्ने कार्यक्रम पनि नियमित जारी राखेको छ । हालसम्म नियमित प्रक्रियामा आएका १६ जना बिरामीले सरकारी अस्पतालको शुल्कमै शल्यक्रिया गरेको डा. खड्गीले जानकारी दिए ।
