काठमाडौं—नेपाल आयुर्वेद चिकित्सक संघको २५ औं स्थापना दिवसको सम्पन्न भएको छ । २० असारमा भएको उक्त कार्यक्रममा स्वास्थ्य तथा जनसंख्यामन्त्री भवानीप्रसाद खापुङको प्रमुख आतिथ्यता रहेको थियो ।
स्वास्थ्य मन्त्री खापुङले आयुर्वेद र नेपाल आयुर्वेद चिकित्सक संघका मागहरू जायज रहेकोमा यसको कार्यान्वयनमा सक्दो सहयोग गर्ने आश्वासन दिएका थिए ।
विशिष्ट अतिथि राष्ट्रिय योजना आयोगका सदस्य डा. उमा शंकर प्रसादले अबको दशक आयुर्वेद को दशक रहेकोले यसको विकास र विस्तार मा विशेष जोड दिनुपर्ने बताए ।
कार्यक्रमका सभापति र नेपाल आयुर्वेद चिकित्सक संघका अध्यक्ष डा. श्यामबाबु यादवले राष्ट्रिय आयुर्वेद प्रतिष्ठानको स्थापना, सरकारी सेवामा रहेका आयुर्वेद चिकित्सकहरूले वृद्धि विकास, आयुर्वेद औषधिको उत्पादन र गुणस्तर निर्धारण, जिल्ला आयुर्वेद औषधालयको आयुर्वेद चिकित्सालयमा स्तरोन्नति र औषधिजन्य जडीबुटीको अनुसन्धानको लागि राष्ट्रिय औषधिजन्य वनस्पति बोर्डको स्थापना, एवं परम्परागत चिकित्सकीय ज्ञानको संरक्षण एवं प्रवर्धन गर्न राष्ट्रिय अभिलेखीकरण प्रक्रियाको थालनी गर्नुपर्ने कुरामा जोड दिएका थिए ।
कार्यक्रममा आयुर्वेद चिकित्सकहरूले ‘नसर्ने रोगमा आयुर्वेद चिकित्सा’ शीर्षकको वैज्ञानिक सत्रमा आ—आफ्ना शोधपत्रहरु प्रस्तुत गरेका थिए । डा. विनोद घिमिरेले ‘नसर्ने रोगमा थेरापिटिक योग र आयुर्वेदको एकीकृत प्रभाव’ र डा. अमितमान जोशीले ‘हाइपोथाइरोडमा जडीबुटी तथा खनिज औषधिको प्रभाव’ शीर्षकका शोधपत्र प्रस्तुत गरेका थिए । उक्त वैज्ञानिक सत्रमा आयुर्वेद विज्ञ र चिकित्सकहरुले आयुर्वेदका विभिन्न चिकित्सा विधिहरूले नसर्ने रोगको चिकित्साका लागि महत्त्वपूर्ण भूमिका निभाउन सक्ने धारणा राखेका थिए । चिकित्सकहरूले यस्ता विधिहरूलाई राष्ट्रिय तथा अन्तर्राष्ट्रिय स्वास्थ्य कार्यक्रममा समावेश गरेर नसर्ने रोगको उपचार र रोकथाम गर्ने विषयमाथि पनि छलफल गरेका थिए ।
कार्यक्रममा आयुर्वेद क्षेत्रमा अतुलनीय योगदान पु¥याउने सात जना आयुर्वेद चिकित्सकहरूलाई पनि सम्मानित गरिएको थियो । सम्मानित हुनेहरुमा डा. चन्द्रराज सपकोटा, डा. कादम्बरी आचार्य, डा. मायादेवी गौतम, डा. रामचन्द्र अधिकारी, डा. बाबुराजा अमात्य, डा. रामचन्द्र पाण्डे र डा. सुरज कर्मचार्य रहेका छन् ।
