काठमाडौं—खड्गी इन्स्टिच्युट अफ इन्डोयूरोलोजीले आरुस लाइफस्टाइल अस्पताल, रेड क्रसन्ट अफ कुवेतसँगको सहकार्यमा आयोजना गरिएको स्वास्थ्य शिविरमा ३१ जनाको निःशुल्क शल्यक्रिया गरिएको छ । १४, १५ र २६ पुसमा संचालन गरिएको स्वास्थ्य शिविरमा ३१ जनाको शल्यक्रिया गरिएको खड्गी इन्स्टिच्युट अफ इन्डोयुरोलोजीले जनाएको छ ।
शिविरमा मिर्गौला पत्थरी भएका २५ जना र प्रोस्टेट ग्रन्थीसम्बन्धी समस्या भएका छ जना गरी ३१ जना विपन्न वर्गका बिरामीको शल्यक्रिया गरिएको हो । उक्त शिविरमा २५ वर्षदेखि ८१ वर्षसम्मका बिरामीले निःशुल्क शल्यक्रिया सेवा लिएका थिए ।
औषधी तथा बेडचार्ज पनि नलिई निःशुल्क गरिएकोे शल्यक्रियामा प्रयोग गरिएका प्रविधिहरु पनि अत्याधुनिक रहेको इन्स्टिच्युटले जनाएको छ ।
स्थापना कालदेखि नै विपन्न वर्गका बिरामीहरुर्ला निःशुल्क शल्यक्रिया सेवा दिँदै आएको खड्गी इन्स्टिच्युटले प्रत्येक दिन ४ जना विपन्न वर्गका बिरामीको कम शुल्कमा शल्यक्रिया गर्दै आएको बताएको छ ।
साथै हाल प्रदान गरेको सेवाले आफुलाई गौरवान्वित तुल्याएको बताउँदै इन्स्टिच्युटका प्रमुख डा. सञ्जय खड्गीले आगामी दिनमा पनि यस्ता सेवाहरु निरन्तर प्रदान गर्ने जनाएका छन् ।
