फ्रान्सको नेशनल इन्स्टिच्युट अफ हेल्थ एन्ड मेडिकल इन्स्टिच्युटले गरेको अनुसन्धानले फ्रान्समा चारमध्ये एक जनालाई कानमा समस्या भएको देखाएको छ। उनीहरु बिस्तारै बहिरा बन्दै गएका छन् । अर्थात्, त्यहाँको २५% जनसंख्या यसबाट प्रभावित भएको छ ।
डिप्रेसन र कोलाहलका कारण मानिसहरु बहिरोपनबाट ग्रसित
पहिलोपटक फ्रान्समा यस्तो अनुसन्धान ठूलो मात्रामा गरिएको छ। जसमा १८ देखि ७५ वर्ष उमेर समूहका १,८६,४६० व्यक्तिलाई समावेश गरिएको थियो । यसअघिको अनुसन्धान सानो तहमा मात्रै हुने गरेको अनुसन्धानकर्ताहरुको भनाइ छ। तर, यसपटक गरिएको अनुसन्धान अनुसार जीवनशैली, सामाजिक एक्लोपन, डिप्रेसन र चर्को स्वरका कारण मानिसमा कानमा समस्या देखिएको छ ।
अनुसन्धानले पत्ता लगाएको छ कि सुगर र डिप्रेसनका कारण कतिपयलाई कानमा समस्या हुने गरेको छ । एकै समयमा केही व्यक्तिहरू एक्लोपन, शहरी कोलाहल र हेडफोनको प्रयोगका कारण समस्याहरू सामना गरिरहेका छन्।
विश्व स्वास्थ्य सङ्गठन (डब्लुएचओ)का अनुसार विश्वका करिब १५ करोड मानिसले कुनै न कुनै रूपमा कान नसुन्ने समस्या भोगिरहेका छन्। यो संख्या २०५० सम्ममा २५० करोड पुग्ने अनुमान गरिएको छ । त्यसैले, यसलाई स्वास्थ्य समस्याको रुपमा हेरिएको छ । सबैभन्दा बढी आवाज र हेडफोन प्रयोग गर्दा समस्या छ।
फ्रान्समा ३७ प्रतिशत मानिसहरू मात्र श्रवण उपकरण प्रयोग गर्छन्। धुम्रपान गर्ने र उच्च बिएमआइ भएका व्यक्तिहरूले पनि श्रवण यन्त्र कम प्रयोग गरिरहेका छन्। बढ्दो समस्यालाई हेरेर गत वर्ष फ्रान्सेली स्वास्थ्य विभागले सर्वसाधारणका लागि श्रवण यन्त्र निःशुल्क उपलब्ध गराएको थियो । श्रवण सहायताको लागि बीमाको पनि व्यवस्था गरिएको छ ।
