कोभिड संक्रमणको आशंकामा धनुषाका एक व्यक्तिलाई काठमाडौं रिफर गरियो

जनकपुर – विश्वभर कोरोनाभाइरसले सताइरहेका बेला धनुषाका एक व्यक्तिमा पनि कोरोना संक्रमण भएको आशंकामा काठमाडौं पठाएको छ। जिल्लाको क्षीरेश्वरनाथ नगरपालिका १ का बिरामीलाई कोरोना संक्रमण भएको आशंकामा थप जाँच र परिक्षणका लागि काठमाडौं रिफर गरिएको हो।

केही दिनअघि मलेसियाबाट फर्केका ती व्यक्तिलाई रुघा, खोकी र ज्वरो देखा परेको थियो। त्यसपछि कोरोना संक्रमण हुन सक्ने आशंकामा उनलाई धनुषाकै रमदैयास्थित जानकी मेडिकल शिक्षण अस्पतालको ‘आइसोलेशन वार्डमा’ भर्ना गरिएको थियो।

तर यहाँ कोरोना चेक जाँच गर्ने सेवा सुविधा नभएका कारण थप उपचारका लागि उनलाई सोमबार काठमाडौं पठाइएको प्रदेश २ स्वास्थ्य निर्देशनालयका वरिष्ठ अधिकृत विजय झाले जानकारी दिए। अस्पतालमा भर्ना भएका यादवलाई चेक जाँच गर्दा भिन्न प्रकारका लक्षणहरु देखा परेपछि काठमाडौंबाट समेत चेक जाँचका लागि चिकित्सकको टोली आएको थियो ।