स्वास्थ्यमन्त्री त्रिपाठीद्वारा पदभार ग्रहण, २६२ वटा आधारभूत अस्पताल निर्माण गर्ने निर्णय

काठमाडौं—नवनियुक्त स्वास्थ्य तथा जनसंख्या मत्री हृदयेश त्रिपाठीले पदभार ग्रहण गरेका छन् । शुक्रबार स्वास्थ्य मन्त्रालयको जिम्मेवारी पाएका त्रिपाठीले आइतबार दिउँसो २ बजे मन्त्रालय पुगेर पदभार ग्रहण गरेका हुन् ।

शुक्रबार प्रधानमन्त्री केपी शर्मा ओलीले मन्त्रिपरिषद विस्तार तथा जिम्मेवारी हेरफेर गरेका थिए । सो क्रममा यसअघिका स्वास्थ्य मन्त्री भानुभक्त ढकाललाई पर्यटनमन्त्रीको जिम्मेवारी दिइएको थियो ।

त्रिपाठीलाई सो क्रममा स्वास्थ्य मन्त्रालय ल्याइएको हो । यसअघि उनले सामान्य प्रशासन मन्त्रालयको जिम्मेवारी सम्हालिरहेका थिए ।

मन्त्रालयमा पदभार ग्रहण गर्दै मन्त्री त्रिपाठीले २६२ वटा आधारभूत अस्पताल निर्माण गर्ने पहिलो निर्णय गरेका छन् । मन्त्रालयले आगामी वर्ष विभिन्न स्थानीय तहमा ५, १० र १५ शैय्याका अस्पताल निर्माण गर्नेछ ।