गण्डकीका मुख्यमन्त्री गुरुङलाई कोरोना संक्रमण

पोखरा – गण्डकीका मुख्यमन्त्री पृथ्वी सुब्बा गुरुङको पिसिआर रिपोर्ट पोजेटिभ आएको छ । मंगलबार दिइएको उनको  स्वाबको रिपोर्ट बुधबार पोजेटिभ आएको हो ।

उनका प्रेस संंयोजक विक्रम न्यौपानेमा कोरोना संक्रमण पुष्टि भएपछि उनको पनि पिसिआर जाँच गरिएको थियो । त्यतिबेला भने रिपोर्ट नेगेटिभ आएको थियो । वैशाख २१ गते मुख्यमन्त्री गुरुङको स्वास्थ्यमा सामान्य समस्या देखियो ।

उनको टाउको दुख्ने र ज्वरो आउने भएको थियो । कोरोना संक्रमण पुष्टि भएको भए पनि उनको अवस्था सामान्य रहेको बताइएको छ । गण्डकी प्रदेश सभाका सदस्य मनकुमारी गुरुङ, राजीब पहारी र प्रभा कोइरालामा कोरोना संक्रमण पुष्टि भएको हो ।

जनमोर्चाका सांसद खीमविक्रम शाहीमा पनि कारोना संक्रमण भएको भन्दै चरक मेमोरियल अस्पतालमा भर्ना गरिएकोमा मंगलबार अस्पतालबाहिर होटलमा बस्न थालेका छन् । मुख्यमन्त्री गुरुङका प्रेस संयोजक न्यौपानेसहित अन्य केही कर्मचारीमा कोरोना पुष्टि भएको बताइएको छ ।