चीनले तत्काल १० लाख डोज भेरोसेल खोप अनुदानमा दिने

काठमाडौँ – चीनले नेपाललाई तत्काल १० लाख डोज कोभिड-१९ विरुद्धको खोप दिने भएको छ । बुधबार राष्ट्रपति विद्यादेवी भण्डारीले चिनियाँ समकक्षी सी जिनपिङसँग गरेको टेलिफोन संवादमा चीनले १० लाख डोज खोप अनुदानमा दिने घोषणा गरेको हो ।

चीनका राष्ट्रपति सी जिनपिङले राष्ट्रपति भण्डारीलाई नेपाललाई कोभिड महामारीविरुद्ध लड्न १० लाख डोज खोप तत्काल उपलब्ध गराउने बताएका थिए । टेलिफोन संवाद पछि नेपालका लागि चिनियाँ राजदुत होउ यान्छी नेपाललाई १० लाख डोज खोप अनुदानमा दिने जानकारी गराएकी हुन् ।

यसअघि चीनले नेपाललाई ८ लाख डोज खोप अनुदानमा दिएको थियो ।

बुधबार दुई राष्ट्रपतिबीच ४० मिनेट लामो कुराकानी भएको थियो । त्यसक्रममा राष्ट्रपति विद्यादेवी भण्डारीले नेपाललाई खोप खरिद प्रक्रियामा सहजीकरण गरिदिन आग्रह समेत गरेकी थिइन् ।