धनगढी—नेपालकै पहिलो शहीद दशरथ चन्द स्वास्थ्य विज्ञान विश्वविद्यालय सिनेट बैंठक पहिलो पटक विश्वविद्यालयमै बस्ने भएको छ । विश्वविद्यालयका यसअघिका तीन वटा सिनेट बैठक काठमाडौंमा भएका थिए ।
तर, यस पटक पहिलो पटक विश्वविद्यालयको चौथो सिनेट बैठक गेटास्थित विश्वविद्यालयमै बस्ने भएको हो । विश्वविद्यालयले आगामी २५ चैतका लागि विश्वविद्यालयको चौथो सिनेट बैठक आव्हान गरेको छ ।
सिनेट बैठकमा प्रधानमन्त्री तथा कुलपति बालेन्द्र शाह सहभागी हुने वा नहुने भन्ने निश्चित भइनसकेको विश्वविद्यालय स्रोतले जनाएको छ । विश्वविद्यालयका सहकुलपतिद्वय स्वास्थ्य तथा जनसंख्या मन्त्री निशा मेहता र शिक्षा, विज्ञान तथा प्रविधि एवं युवा तथा खेलकूदमन्त्री सस्मित पोखरेल भने सहभागी हुने तय भएको विश्वविद्यालयले जनाएको छ ।
विश्वविद्यालयको उपकुलपति प्रा.डा. सुनिलकुमार जोशी विश्वविद्यालयमा यही शैक्षिक सत्रबाट एमबीबीएसलगायतका चिकित्सा शिक्षाका स्नातक तहका कार्यक्रम सञ्चालन गर्न कस्सिएर लागेका छन् । यसै सिलसिलामा उनले हालै काठमाडौंमा प्रधानमन्त्री शाह, शिक्षामन्त्री पोखरेल, स्वास्थ्यमन्त्री मेहतालगायतलाई भेटेर वस्तुस्थितीबारे जानकारी गराइसकेका छन् ।
