स्वास्थ्य निर्देशनालयका ८८ वटा अल्ट्रासाउण्ड मेसिन धनगढी पुगे

धनगढी-सुदूरपश्चिम स्वास्थ्य निर्देशनालयको ८८ वटा अल्ट्रा साउण्ड मेसिन धनगढी पुगेका छन् ।

संघीय सरकारबाट मातृ तथा बाल स्वास्थ्य सुदृढीकरणको लागि सुदूरपश्चिम प्रदेशलाई विशेष अनुदान प्राप्त भएको हुँदा सामाजिक विकास मन्त्रालयबाट प्रदेशमा रहेका स्थानीय तहहरुको लागि ग्रामीण अल्ट्रासाउन्ड खरिद गरी वितरण गर्न निर्देशनालयलाई आ.व. ०७५/०७६ को अन्तमा कार्यक्रम तथा बजेट प्राप्त भएको थियो ।

अल्ट्रासाउन्ड खरिदको लागि १२ करोड ३२ लाख बजेट विनियोजन भएको हो । उक्त अल्ट्रासाउण्ड मेसिन को मुल्य १० लाख २४ हजार ३२० अमेरिकी डलर रहेको छ । अल्ट्रासाउण्ड मेसिनको भन्सार शुल्क रु ५८ लाख ८२ हजार ७१८ रहेको छ भने भ्याट शुल्क रु १ करोड ६० लाख ५९ हजार ८८५ रहेको छ ।

अल्ट्रासाउण्ड मेसिन १ महिनाभित्रै सम्बन्धित स्थानीय तहलाई वितरण गरिने स्वास्थ्य निर्देशनालयका निर्देशक गुणराज अबस्थीले बताए । अल्ट्रा साउण्ड मेसिन को बायोमेडिकल इन्जिनियरबाट post shipment inspection को कार्य भैरहेको छ ।