जुम्ला—जिल्ला समन्वय समिति जुम्लाले कर्णाली स्वास्थ्य विज्ञान प्रतिष्ठान जुम्लामा स्टाफ नर्स भर्ना विवादित विषयमा छानविन गर्न भन्दै जिल्ला प्रशासन कार्यालय जुम्लालाई पत्र पठाएको छ ।
प्रतिष्ठानले स्टाफ नर्सको भर्नाका लागि सूचना आह्वान गरी २६ भदौंमा लिखित परीक्षामा ५० जनाको नाम संलग्न नतिजा प्रकाशन गरी २८, २९ र ३० भदौंमा मौखिक परीक्षाको नतिजा प्रकाशन गरेको थियो ।
अन्तिम नतिजा प्रकाशनमा सिम्बल नम्बर एसएन ०५७ सपना न्यौपानेको नामा परीक्षा उत्तीर्णको सूचना प्रकाशन भएकोमा उक्त सिम्वल नम्बर सदिक्षा रोकायाको भएको देखिन्छ ।
परीक्षाको बास्तविकता के हो भन्ने विषयमा छानविन गर्न पत्राचार गरिएको जिल्ला समन्वय समितिका कार्यवाहक प्रमुख कार्मा बुढाले बताए । आवश्यक छानविन गरी परीक्षार्थीहरुको न्याय र कर्णाली स्वास्थ्य विज्ञान प्रतिष्ठानको छवि बचाउनुपर्ने उनको भनाइ छ ।
प्रतिष्ठानले माग गरेको करार सेवाका स्टाफ नर्सका विषयमा परीक्षा समितिले त्रुटि गरेपछि विवादित बनेको हो । आवेदन सूचीमा नाम नभएका परीक्षार्थीको पहिलो सूचीमा नाम निकालिएको भन्दै चर्को आलोचना समेत भएको छ ।
३० साउनमा गरिएको सार्वजनिक सूचनाअनुसार प्रतिष्ठानमा २५ जना नर्स करार सेवामा माग गरिएको थियो । जसमा जम्मा १६३ जनाले आवेदन दिएका थिए । त्यसबाट पनि प्रतिष्ठानले सार्वजनिक गरेको आवेदन सूचीमा सपना न्यौपाने नभएर सपना नेपाली भनेर नाम सूचीमा प्रकाशित भएको थियो । लिखितमा नाम निकाल्न सफल परिक्षार्थीको नाम सूचीमा पनि उल्लेख छैन । प्रष्ठिानले २६ भदौैंमा लिखित परीक्षा लिएको थियो । प्रतिष्ठानले यस पटक परीक्षा कोडिङ र डिकोडिङ प्रणालीबाट सञ्चालन गरेको थियो । प्रतिष्ठानले परीक्षा मर्यादित र चुस्तदुस्त बनाउनकै लागि कोडिङ प्रणाली लागु गरेको प्रतिष्ठानले जनाएको छ । परीक्षा समितिको प्राविधिक त्रुटिले यस्तो समस्या भएको प्रतिष्ठानको स्रोतले जनाएको छ ।
रजिष्ट्रार नृपेन्द्र महतका अनुसार कुनै पनि परिक्षार्थीलाई हामीले दिइएको परीक्षाको नतिजामा चित्त नबुझेको खण्डमा ४८ अण्टा भित्र रिचेकको लागि निवेदन दिने ब्यवस्था गरेको गरिएको थियो । रजिष्ट्रार महतकाअनुसार रिचेकका लागि निवेदन दिएका ८ जना विद्यार्थीमध्ये एक जना सपना न्यौपाने रहेको बताए । उनले सपना न्यौपानेको परीक्षा पेपर रिचेक गर्दा उनको एक नम्बरमा नाम आउन सफल भएको बताए । महतले सदिक्षा रोकायाको र सपना न्यौपानेको चेकजाँच गर्दा डिकोडिङमा भुलबस त्रुटि भएको स्वीकारे ।
