जुम्ला—कर्णाली स्वास्थ्य विज्ञान प्रतिष्ठान शिक्षण अस्पताल जुम्ला र शहीद गंगालाल राष्ट्रिय हृदय रोग केन्द्रबीच शैक्षिक अनुसन्धान कार्यका लागि सम्झौता भएको छ । कर्णाली स्वास्थ्य विज्ञान प्रतिष्ठान र शहीद गंगालाल राष्ट्रिय हृदय केन्द्रबीच शैक्षिक अनुसन्धानात्मक कार्यका लागि औपचारिक सम्झौता भएको हो ।
कर्णाली स्वास्थ्य विज्ञान प्रतिष्ठानका उपकुलपति डा. मंगल रावलले गंगालाल अस्पताल कर्णाली प्रतिष्ठानबीच जनशक्तिको सुदृढीकरण, शैक्षिक अनुसन्धान र जनशक्तिको आदान—प्रदानलगायतका विषयमा सम्झौता भएको बताए ।
सम्झौताअनुसार अब कर्णाली स्वास्थ्य विज्ञान प्रतिष्ठानमा मेडिकल अध्ययन गर्ने विद्यार्थीहरूले गंगालाल अस्पतालमा मुटु रोगका उपचारबारे तालिम लिन पाउनेछन् । गंगालालका विद्यार्थीहरूले पनि कर्णाली प्रतिष्ठानबाट आवश्यक सहयोग परामर्श लिने पाउनेछन् ।
कर्णाली स्वास्थ्य विज्ञान प्रतिष्ठानमा अध्ययनरत विद्यार्थीलाई मुटु रोग सम्बन्धी अनुसन्धान तथा तालिमका लागि गंगालाल अस्पतालले सहयोग गर्ने प्रतिष्ठानका उपकुलपति डा. रावलले बताए ।
सम्झौताअनुसार कर्णाली स्वास्थ्य विज्ञान प्रतिष्ठानमा अध्ययनरत चिकित्सकलाई गंगालालमा दुई महिनासम्मको मुटु रोगको प्राथमिक उपचार तथा मुटु रोगका बारेमा तालिम लिन पाउने व्यवस्था भएको हो । यो सम्झौताले त्यहाँ पढ्ने मेडिकल विद्यार्थीको क्षमता अभिवृद्धि गर्न सहयोग पुग्छ भन्ने विश्वास गरिएको छ ।
सहकार्य र समन्वयका आधारमा गरिने कामले नजिता सकारात्मक दिने भन्दै सम्झौताले सुगम र दुर्गमको स्वास्थ्य सेवा प्रभावकारी तथा अध्ययन अनुसन्धान पनि परिणाममुखी हुने बताइएको छ ।
