जुम्ला—कर्णाली स्वास्थ्य विज्ञान प्रतिष्ठानको रिक्त रहेको शिक्षाध्यक्ष (रेक्टर) पदमा डा. डबल धामी नियुक्त भएका छन् । प्रतिष्ठानका सहकुलपतिसमेत रहेका स्वास्थ्य तथा जनसंख्यामन्त्री मोहनबहादुर बस्नेतले डा. धामीलाई रेक्टारमा नियुक्त गरेका हुन् ।
मन्त्री बस्नेतले प्रतिष्ठानका उपकुलपति डा मंगल रावलको सिफारिसका आधारमा डा. धामीलाई नियुक्त गरेका हुन् । उपकुलपति डा. रावलले डा. धामीसहित डा.भूमीराज क्षेत्री र डा. कुशल भट्टराईको नाम सिफारिस गरेका थिए ।
यसअघि रेक्टरका लागि अन्य तीन जनाको नाम सिफारिस भएको थियो । तर, मन्त्री बस्नेतले उनीहरु बाहेकका नाम सिफारिस गर्न भनेपछि उपकुलपति डा. रावलले नयाँ तीन जनाको नाम सिफारिस गरेका हुन् ।
उपकुलपति डा. रावलले रेक्टरका लागि यसअघि डा. राजीव शाह, डा. माया राई र डा. अनुस्मृती पालको नाम सिफारिस गरेका थिए ।
करार प्राध्यापक आन्दोलित
कर्णाली स्वास्थ्य विज्ञान प्रतिष्ठान जुम्लामा करारमा कार्यरत अध्यापक/प्राध्यापकहरुले आन्दोलन सुरु गरेका छन् । प्रतिष्ठानको नियमितता र स्थायीत्वको लागि भन्दै उनीहरुले आइतबारदेखि आन्दोलन सुरु गरेका हुन् ।
असार २३ सम्म कालोपट्टी बाँधेर सेवा सुचारु गर्ने, असार २४ देखि साउन ६ सम्म तालाबन्दीसहितको रिले अनशन कार्यक्रम गर्ने आन्दोलनका कार्यक्रम सार्वजनिक गरेका छन् ।
साउन ७ देखि अनिश्चितकालिन आकस्मिक चिकित्सकीय सेवाबाहेक अन्य सबै प्रकारका सेवाहरु अवरुद्ध गर्ने उनीहरुको तयारी छ । यसअघि कुलपति, उपकुलपतिलगायत सम्बन्धित निकायलाई ज्ञापनपत्र बुझाए पनि आफ्नो माग सुनुवाई नभएपछि आन्दोलित हुनु परेको करारका प्राध्यापक बताउँछन् ।
