वीरेन्द्रनगर—जाजरकोटको भेरी नगरपालिकाका स्वास्थ्यकर्मीले सात महिनाको तलब भत्ता पाउन सकेका छैनन् । नगरपालिकाका कार्यरत संघीय सरकारबाट खटिएका स्वास्थ्यकर्मीहरुले सात महिनाका तलब भत्ता पाउन सकेका छैनन् ।
नगरपालिकामा ३७ जना स्थायी र २१ जना करार गरी जम्मा ५८ जना स्वास्थ्यका कर्मचारीहरू रहेका छन् ।
लामो समयसम्म तलब नपाउँदा कर्मचारीहरुको काममा ध्यान केन्द्रीत हुन नसकेको भेरी नगरपालिकामा कार्यरत स्वास्थ्य निरीक्षक निशा थापाले बताइन् । ‘कर्मचारीहरुको ध्यान काममा भन्दा तलबमा रहेको छ,’ उनले भनिन्, ‘समयमा तलब नआउँदा बैंकबाट ऋण लिएर केही कर्मचारीहरूले काम चलाइरहेका छन् ।’
पालिकामा दरबन्दीभन्दा ९ जना कर्मचारी धेरै भएको कारण पनि यस्तो समस्या आएको हुन सक्ने निरीक्षक थापाले बताइन् । ‘दरबन्दीभन्दा धेरै कर्मचारी भएपनि हाजिर लगाउनु हामी तलब हाल्दिन्छौं भने पनि सात महिनादेखि तलब पाएका छैनौं,’ उनले भनिन्, ‘तलब नपाउँदा ऋण काढेर घर खर्च चलाउनुपर्ने बाध्यता छ ।’
स्थानीय सरकारमा काम गरिरहेपनि संघअन्तर्गतका कर्मचारी भनेर यस बारेमा पालिकाले कुनै चासो नदेखाएको भेरी नगरपालिकाको स्वास्थ्य शाखा प्रमुख खेम पुनले बताए । ‘यति लामो समयसम्म पनि पालिकामा कार्यरत कर्मचारीले तलब नपाउँदा पालिकाले चासो देखाउनुपर्ने हो,’ उनले भने ।
संघीय सरकारका कर्मचारी भएका कारण संघले तलब दिनुपर्ने नगरपालिकाका प्रमुख प्रशासकीय अधिकृत कृष्णप्रसाद जैसीले बताए । ‘नगरपालिकाबाट बारम्बार संघमा पत्र पठाएको भए पनि संघले कुनै पनि जवाफ दिएको छैन्,’ उनले भने, ‘तर, संघीय सरकारबाट कुनै जवाफ आएको छैन् ।’
