हुम्लाबाट एक जना सुत्केरी महिलाको हेलिकोप्टरमार्फत उद्धार

वीरेन्द्रनगर– हुम्लाबाट एक जना सुत्केरी महिलाको हेलिकप्टरमार्फत उद्धार गरिएको छ । सुत्केरी व्यथा लागेर  थला परेकी महिलाको नेपाली सेनाको हेलिकोप्टरमार्फत उद्धार गरिएको हो ।

हुम्लाको अदानचुली गाउँपालिका–४ की २३ वर्षीया राजकला ढकाल (पाण्डे)लाई हेलिकोप्टरबाट उद्धार गरेर कर्णाली प्रादेशिक अस्पताल सुर्खेतमा ल्याइएको छ ।

सत्र घण्टादेखि सुत्केरी व्यथाले थलिएकी पाण्डेको र बच्चाको ज्यान बचाउन विभिन्न निकायको पहलमा उद्धार गरिएको गाउँपालिकाका स्वास्थ्य शाखा प्रमुख हंसबहादुर महतराले बताए । ‘पाण्डेको गर्भमा रहेको शिशुको यसै महिनाको २० गतेका लागि समय तोकिएको थियो ।’ उनले भने,‘व्यथा लागेपछि श्रीनगर स्वास्थ्य चौकीमा भर्ना भएकी उनको जटिल स्थिति  (ब्रिज प्रिजेन्टेसन) भएकाले बुधवार नै रेफर गरिए पनि यातायातको साधनको अभावमा बिहीबार बिहान मात्र सुर्खेत पुर्‍याएको छ ।’

कर्णाली लगायतका दुर्गमका जिल्लामा सङ्घीय सरकारको महिला, बालबालिका तथा ज्येष्ठ नागरिक मन्त्रालयको राष्ट्रपति महिला उद्धार कार्यक्रमले सुत्केरी महिलाको उद्धार गर्दै आएको छ ।