शिवालय गाउँपालिकाको एम्बुलेन्स ४ महिनादेखि थन्कियो

वीरेन्द्रनगर—जाजरकोट शिवालय गाउँपालिकाको एम्बुलेन्स चार महिनादेखि थन्किएको छ । बिग्रिएको एम्बुलेन्समर्मत नहुँदा एम्बुलेन्स थन्किएको हो ।

एम्बुलेन्स बिग्रेको चार महिनासम्म मर्मत नगर्नु जनप्रतिनिधि र कर्मचारीले लापरवाही गरेको स्थानीय धनीराम आचार्यले बताए । ‘एम्बुलेन्स नहुँदा बिरामी स्टेचरमा बोक्न स्थानीय बाध्य छन्,’ उनले भने, ‘गाउँमा बिरामी हुँदा गाडी नै नपाइने र पाइएपनि निजी जीपमा महँगो भाडा तिरेर अस्पताल लैजानुपर्दा साह्रै दुःख खेप्नु परेको छ ।’

थन्किएको एम्बुलेन्समर्मतका लागि धेरै खर्च लाग्ने भएपछि मर्मत गर्न नसकिएको गाउँपालिकाका निमित्त प्रमुख प्रशासकीय अधिकृत मानबहादुर बस्नेतले बताए । ‘एम्बुलेन्स मर्मतका लागि धेरै खर्च लाग्ने भएपछि मर्मत गर्न सकिएको छैन्,’ उनले भने, ‘अब छिट्टै नयाँ एम्बुलेन्स खरिदको तयारीमा छौं ।’