७७ जिल्लामा आरडिटी परीक्षण, १५ स्थानमा पीसीआर

काठमाडौं—देशभर हालसम्म कोरोना भाइरस (कोभिड—१९) को आशंकामा परीक्षण हुनेको संख्या ४० हजार ४ सय ३१ पुगेको छ । पीसीआर प्रविधीबाट ९ हजार ११ र आरडिटीबाट ३१ हजार ४ सय २० जनाको नमूना परीक्षण भएको स्वास्थ्य मन्त्रालयले जनाएको छ ।

मन्त्रालयका प्रवक्ता डा. विकास देवकोटाकाअनुसार हालसम्म ४५ जना संक्रमित फेला परेका छन् । बुधबार मात्रै तीन जना थपिएका हुन् । ७ जना निको भएर घर फर्किएका छन् भने बाँकी ३५ जना विभिन्न अस्पतालमा उपचाररत छन् ।

मन्त्रालयकाअनुसार आरडिटी परीक्षण ७७ जिल्लामा पुगेको छ । शंकास्पद व्यक्तिको आरडिटीमार्फत कोभिड—१९ परीक्षण गर्दा पोजेटिभ आएको खण्डमा पीसीआर परीक्षणका लागि तोकिएका प्रयोगशालामा पठाउने गरिन्छ । ३५ संक्रमित पाटन अस्पतालमा २, बाग्लुङ अस्पतालमा १, भरतपुर अस्पतालमा २, धनगढीमा २, वीरगञ्जमा ४ र विराटनगरमा २४ जना छन् ।

पीसीआर कहाँ—कहाँ हुन्छ जाँच

•  राष्ट्रिय जनस्वास्थ्य प्रयोगशाला, टेकु
• शुक्रराज ट्रपिकल तथा सरुवारोग अस्पताल, टेकु
• विपी कोइराला स्वास्थ्य विज्ञान प्रतिष्ठान, धरान
• कोशी अस्पताल, विराटनगर
• जनकपुर प्रादेशिक, अस्पताल
• भरतपुर अस्पताल कोभिड—१९ प्रयोगशाला
• प्रादेशिक प्रयोगशाला, भैरहवा
• वीर अस्पताल, काठमाडौ
• पोखरा स्वास्थ्य विज्ञान प्रतिष्ठान
• किटजन्य रोग अनुसन्धान तथा तालिम केन्द्र, हेटौडा
• काठमाडौ शिक्षण अस्पताल, धुलिखेल
• पाटन अस्पताल, ललितपुर
• सुर्खेत प्रादेशिक अस्पताल, सुर्खेत
• भेरी अस्पताल, नेपालगञ्ज
• सेती प्रादेशिक अस्पताल, धनगढी