कोरोनाबाट थप १ को मृत्यु, नेपालमा मृत्यु हुनेको संख्या ९ पुग्यो

काठमाडौँ – कोरोनाका कारण थप एक वृद्धको मृत्यु भएको छ । बुधबारको नियमित पत्रकार सम्मेलनमा स्वास्थ्य तथा जनसंख्या मन्त्रालयका प्रवक्ता डा. विकास देवकोटाले दोलखा घर भएका ७६ वर्षीय वृद्धको  मृत्यु भएको जानकारी दिएका हुन् ।

 प्रवक्ता डा. देवकोटाका अनुसार मस्तिष्कमा समस्या भएका उक्त वृद्ध गत १५ जेठमा काठमाडौँ मेडिकल कलेजमा शल्यक्रिया भएको थियो । उनलाई उपचारको लागि त्रिवी शिक्षण अस्पतालमा लागिएको थियो  । उनको उक्त अस्पतालमा निधन भएको हो । शल्यक्रिया गरिनुअघि उनको कोभिड १९ जाँच गर्दा पोजेटिभ देखिएको थियो ।

योसँगै कोभिडका कारण नेपालमा मृत्यु हुनेको संख्या ९ जना पुगेको छ । त्यस्तै, आज थप २ सय १ मा कोरोना पुष्टि भएसँगै संक्रमितको संख्या २ हजार ३ सय पुगेको छ । जसमध्ये २७८ जना निको भएका छन् ।