कञ्चनपुर—कञ्चनपुरको वेदकोट नगरपालिकाका सामुदायिक विद्यालयमा स्यानिटरी प्याड भेन्डिङ मेसिन जडान गरिने भएको छ । मंगलबारबाट नगरपालिकाले नगरका सामुदायिक विद्यालय र स्वास्थ्य संस्थाहरुमा पहिलो पटक स्यानिटरी प्याड भेन्डिङ मेसिन जडान गर्न सुरु गरेको हो ।
वेदकोटका सबै सामुदायिक विद्यालयहरुमा स्यानिटरी प्याड भेन्डिङ मेसिन जडान गर्ने नेपालकै पहिलो नगरपालिका बन्ने नगर प्रमुख अशोककुमार चन्दले बताए । उनका अनुसार नगरपपालिकाका २४ सामुदायिक विद्यालय र नौं स्वास्थ्य संस्थामा उक्त मेसिन जडान गरिन लागेको हो ।
पहिलो दिन वेदकोटस्थित भुवनेश्वरी माध्यमिक विद्यालय, नवदुर्गा आधारभुत विद्यालय, उदयदेव र घाटल माध्यमिक विद्यायलमा जडान गरिएको छ । छात्राहरुलाई महिनावारी भएको बेलामा विद्यालय छोड्नुपर्ने बाध्यता अन्त्यका लागि उक्त मेसिन वडा कार्यालयले जडान गरिदिएको नगर प्रमुख चन्दको भनाइ छ ।
स्यानिटरी प्याड भेन्डिङ मेसिन जडानपछि विद्यालयलाई मास्टर कार्ड दिइएको छ । उक्त कार्ड मसिन भित्र हालेपछि स्यानिटरी प्याड बाहिर निस्कने व्यवस्था गरिएको छ । प्याडका लागि मास्र्टर कार्डमा रिचार्ज गर्नु पर्नेछ । मेसिन जडान भएपछि छात्राहरु खुशी भएका छन् ।
