वीर अस्पतालमा सबै किसिमका बिरामीको उपचार सुचारू

काठमाडौं—चिकित्सा विज्ञान राष्ट्रिय प्रतिष्ठान वीर अस्पतालले सबै किसिमका स्वास्थ्य सेवा सुचारू गरेको छ । कोभिड—१९ को महामारी सुरु भएसँगै कोभिड संक्रमितको मात्र उपचार हुँदै आएको वीर अस्पतालमा बुधवारबाट सबै खालका बिरामीको उपचार सुचारू गरिएको हो ।

अस्पतालका निर्देशक डा. केदार सेन्चुरीद्वारा जारी गरिएको सूचनामा कोभिड—१९ का बिरामीको उपचार सँगसँगै अन्य सामान्य तथा विशेषज्ञ सेवाहरु साविक बमोजिम नै सुरु भएको उल्लेख गरिएको छ ।

झण्डै ६ महिनादेखि कोभिडका बिरामी मात्र उपचार भएको सो अस्पतालमा उपचारमा संलग्न स्वास्थ्यकर्मीले भत्ता नपाएको भन्दै एक महिना अन्दोलन चलेको थियो ।