नेपालमा थप ९७ जनामा कोरोना संक्रमण, तीन जनाको मृत्यु

काठमाडौं—नेपालमा थप ९७ जनामा कोरोना संक्रमण देखिएको छ । स्वास्थ्य तथा जनसंख्या मन्त्रालयकाअनुसार पछिल्लो २४ घण्टामा २ हजार ९ सय ३१ जनाको पिसिआर परीक्षण भएकोमा थप ९७ जनामा कोरोना संक्रमण पुष्टि भएको हो ।

कोरोना संक्रमित भएका ९७ जनामध्ये ३१ जना महिला र ६६ जना पुरुष रहेका छन् । यससँगै अहिलेसम्म नेपालमा कोरोना संक्रमित हुनेको संख्या २ लाख ७३ हजार २ सय ६३ पुगेको छ ।

काठमाडौं उपत्यकामा पछिल्लो २४ घण्टामा ३४ जना कोरोना संक्रमित थपिएका छन् । जसमध्ये १४ जना महिला र २० जना पुरुष रहेका छन् ।

पछिल्लो २४ घण्टामा कोरोनामुक्त हुनेको संख्या १ सय १४ जना रहेको छ । नेपालमा अहिलेसम्म २ लाख ६९ हजार ६ सय १९ जना कोरोना संक्रमणमुक्त भइसकेका छन् । नेपालमा कोरोना संक्रमण निको हुने दर ९८.७ प्रतिशत रहेको छ ।

मन्त्रालयकाअनुसार पछिल्लो २४ घण्टामा ३ जना कोरोना संक्रमितको मृत्यु भएको छ । यससँगै अहिलेसम्म नेपालमा कोरोना संक्रमणबाट मृत्यु हुनेको संख्या २ हजार ६१ पुगेको छ ।