काठमाडौं—रसुवाको भोटेकोशी बाढी प्रभावितहरुको सहयोगका लागि त्रिवि शिक्षण अस्पतालका ग्यास्ट्रो तथा कलेजो प्रत्यारोपण सर्जन प्रा.डा. रमेशसिंह भण्डारीले सांगीतिक प्रस्तुति दिएका छन् । शनिबार ठमेलस्थित नेपालकै ठूलो र अत्याधुनिक क्लब नोभामा प्रा.डा. भण्डारीले एकल सांगीतिक प्रस्तुति दिएका हुन् ।
उक्त सांगीतिक कार्यक्रमबाट उठेको रकम रसुवाको भोटेकोशीमा आएको बाढी प्रभावितको उद्धार, राहत तथा पुनस्थापनामा खर्च गर्न प्रधानमन्त्री राहत कोषलाई प्रदान गरिनेछ ।
प्रा.डा. भण्डारीले बाढी प्रभावितहरुको उद्धार, राहत तथा पुनःस्थापना खटिएका सुरक्षाकर्मीको सम्मानमा सांगीतिक कार्यक्रम समर्पित गरेका थिए । बाढी प्रभावितको उद्धार, राहात र पुनस्थापनामा खटिएका नेपाली सेना, नेपाल प्रहरी र सशस्त्र प्रहरीको सम्मानमा ‘धन्यवाद’ नामक थिममा उक्त सांगीतिक कार्यक्रम बनाइएको थियो ।
सांगीतिक कार्यक्रममा डा. भण्डारीलाई देव लामा र रोशन श्रेष्ठसहितको टिमले साथ दिएको थियो । जसमा उनले आफ्ना र अन्य विभिन्न गायक/गायिकाका गीतहरुबाट उपस्थितहरुलाई मन्त्रमुग्ध बनाएका थिए । कार्यक्रमको होस्ट भने पूर्व मिस नेपाल सुगारिक केसी रहेकी थिइन् ।
यसअघि एलओडीमा समेत सोलो प्रस्तुति दिइसकेका सर्जन डा. भण्डारीका एक दर्जन बढी गीत सार्वजनिक भइसकेका छन् ।
