काठमाडौं—परराष्ट्रमन्त्री प्रदीप ज्ञवाली र भारतीय विदेशमन्त्री एस जयशंकरबीच टेलिफोन संवाद हुने भएको छ । नेपालले भारतीय कम्पनी सेरम इन्स्टिच्युट अफ इण्डियासँग किनेको १० लाख डोज खोप आउन ढिलाइ भइरहेका बेला दुई देशका परराष्ट्रमन्त्रीबीच हुन लागेको संवादलाई अर्थपूर्ण रुपमा हेरिएको छ ।
स्रोतकाअनुसार मन्त्री ज्ञवाली र उनका समकक्षी जयशंकरबीच शुक्रबार दिउँसो ३ः३० बजे टेलिफोन कुराकानी हुन लागेको हो । ‘सम्भवतः कोभिड—१९ भ्याक्सिनका विषयमा कुरा हुनेछ,’ स्रोतले भन्यो, ‘नेपालमा अहिले खोपको आवश्यकता छ । भारतीय कम्पनीले नेपाल खरिद गरेको जति खोप पनि दिन सकेको छैन ।’
अहिले भारतमा तीब्र रुपमा कोभिड—१९ फैलिरहेकाले यस विषयमा पनि दुई देशका परराष्ट्रमन्त्रीबीच कुराकानी हुनेछ ।
‘पछिल्लो समय भारत र नेपालमा फैलिएको कोभिडका विषयमा समेत छलफल हुनेछ,’ स्रोतले भन्यो, ‘केही निर्णय समेत हुन सक्ने सम्भावना छ ।’