काठमाडौँ – विवेकशील साझाको चुनावी प्रतिज्ञापत्रमा स्वास्थ्यका एजेन्डा पनि समावेश गरिएको छ। पार्टीले महानगरपालिकाको लागि आफ्नो चुनावी सार्वजनिक प्रतिज्ञापत्रमा गुणस्तरीय स्वास्थ्य सेवामा लगानी, उमेर समूहका नागरिकको मनो-सामाजिक स्वास्थ्यका लागि स्वास्थ्य केन्द्रमा विशेषज्ञहरूको व्यवस्था गर्ने र अधारभुत स्वास्थ्य नि:शुल्क गर्ने जस्ता एजेन्डा पत्रमा उल्लेख छ।
‘गुणस्तरीय शिक्षा, स्वास्थ्य र सामाजिक सुरक्षा’ रहेको ७ नम्बरको बुँदामा भनिएको छ , ‘बीमा सहितको नियमित स्वास्थ्य परीक्षण प्रवर्द्धन गरी सर्वसुलभ र गुणस्तरीय स्वास्थ्य सेवा सुनिश्चितताका लागि लगानी, अनुगमन र नियमन गरिने, मातृशिशु र ज्येष्ठ नागरिकको स्वास्थ्य रक्षाका लागि स्वास्थ्य केन्द्रमा आवश्यक जनशक्ति र सुविधा वृद्धि गरिने, र महानगरका हरेक वडामा प्राथमिक उपचार र आधारभूत स्वास्थ्य परीक्षण निस्शुल्क हुने गरी वडा क्लिनिकू सञ्चालन गरिनेछ।’
त्यस्तै, सबै उमेर समूहका नागरिकको मानसिक तथा मनोसामाजिक स्वास्थ्यका लागि स्वास्थ्य केन्द्रमा विशेषज्ञहरूको व्यवस्था गर्ने , अनाथ, असहाय बालबालिका तथा नागरिकहरूलाई निस्शुल्क आवास सहित पूर्ण रेखदेखको व्यवस्था मिलाइने र अध्ययनरत तथा कामकाजी महिलाहरूका लागि शिशु स्याहार तथा रेखदेख केन्द्र व्यवस्था गरिने पनि बुँदामा समाबेश छ।
>
