लमजुङमा १०७ जनाको निःशुल्क शल्यक्रियामार्फत आँखा उपचार

पोखरा–जिल्ला अस्पताल लमजुङको आयोजना तथा हिमालय आँखा अस्पतालको प्राविधिक सहयोगमा निःशुल्क आँखा शिविर सञ्चालन गरिएको छ । शिविरमा जम्मा ७ सय २५ जनाको आँखा जाँच गरिएको थियो ।

शिविरबाट शल्यक्रियामार्फत आँखाको उपचार गर्नुपर्ने मोतीबिन्दु भएका १ सय १५ जना बिरामी पहिचान भएको लमजुङ जिल्ला अस्पतालका प्रशासन प्रमुख हेमन्त श्रेष्ठले जानकारी दिए ।

भदौ १६ देखि २१ सम्म सञ्चालित शिविरबाट ४३ वर्षदेखि ९९ वर्षसम्मका व्यक्तिमा मोतीबिन्दु भएको पाइएको अस्पतालका नेत्र सहायक दीप गुरुङले जानकारी दिए । उनका अनुसार ५ जनाको दुवै आँखामा मोतीबिन्दु भएको थियो, जसमध्ये ३ जनाको दुवै आँखाको शल्यक्रिया गरिएको छ । २ जनाको भने एकएक आँखाको मात्रै शल्यक्रिया गरिएको छ ।

अस्पतालका अनुसार बिहीबारसम्ममा पहिचान भएका १ सय १५ मध्ये १ सय ७ जनाको आँखाको निःशुल्क शल्यक्रिया गरिएको छ । बाँकी बिरामी अस्पतालको सम्पर्कमा नआएको अस्पतालले जनाएको छ । शिविर सुरु हुनुभन्दा २ हप्ताअघि सूचना जारी गर्दै अस्पतालले आँखा शिविर हुने जानकारी लमजुङवासीलाई गराएको थियो ।