२०८१ असार ३१, सोमबार
Health Aawaj logo
गृहपृष्ठसमाचारदुई वर्षमा ३९६ मध्ये १७ वटा आधारभूत अस्पताल मात्रै निर्माणको अन्तिम चरणमा

दुई वर्षमा ३९६ मध्ये १७ वटा आधारभूत अस्पताल मात्रै निर्माणको अन्तिम चरणमा


काठमाडौं—सरकारले एकै पटक शिलान्यास गरेर निर्माण घोषणा गरेका ३९६ वटा आधारभूत अस्पतालमध्ये १७ वटा अस्पतालमात्रै निर्माणको अन्तिम चरणमा पुगेका छन् । सरकारले दुई वर्षअघि एकै चरणमा देशभरका ३९६ स्थानीय तहका ५, १० र १५ शैय्याका आधारभूत अस्पताल एकै चरणमा शिलान्यास गरेको थियो ।

स्वास्थ्य तथा जनसंख्या मन्त्रालयकाअनुसार यो अवधिमा १७ वटा आधारभूत अस्पताल मात्रै निर्माणको अन्तिम चरणमा पुगेका छन् । अन्तिम चरणमा पुगेका आधारभूत अस्पतालहरुले अन्तिम निकासा (छैटौं किस्ता)का लागि मन्त्रालयसँग माग गरिसकेका छन् ।

स्वास्थ्य मन्त्रालयका अधिकारीहरुकाअनुसार उनीहरुले माग गरेअनुसारको रकम भुक्तानीको सहमतिको लागि अर्थ मन्त्रालय पठाइएको छ । छैटौ किस्ता माग गर्ने पालिकाहरुमा सुनसरीको देवानगन्ज नगरपालिकाको १० शैय्याको अस्पताल, खोटाङको केपिलासगढी गाउँपालिका र जनतेढुंगा गाउँपालिकाको १५-१५ शैय्याका अस्पताल रहेका छन् ।

यस्तै धनुषाको बटेश्वर गाउँपालिका १० शैय्या र धनुषाधाम नगरपालिकाको १५ शैय्या, सप्तरीको कन्चनपुर नगरपालिका १५ शैय्या, सिरहाको मिर्चैया नगरपालिकाको १५ शैय्या, रौतहटको देव गोनाही नगरपालिका १५ शैय्याको अस्पताल अन्तिम चरणमा पुगेका छन् ।

पर्वतको जलजला गाउँपालिकाको १० शैय्या र महाशिला गाउँपालिकाको १५ शैय्या, गोरखाको बारपाक सुलीकोट गाउँपालिकाको १५ शैय्या, प्युठानको झिमरुक गाउँपालिकाको १५ शैय्या र गुल्मीको चन्द्रकोट गाउँपालिकाको १५ शैय्याको अस्पताल रहेका छन् ।

यसैगरी, जाजरकोट छेडागाडा नगरपालिकाको १५ शैय्या, सुर्खेतको चौकुने गाउँपालिकाको १५ शैय्या, दैलेखको आठबीस नगरपालिका १५ शैय्या र गन्यापधुरा गाउँपालिकाको १५ शैय्याको अस्पताल रहेका छन् ।

सरकारले ५ शैय्याका लागि ७ करोड रुपैयाँ, १० शैय्याको ११ करोड र १५ शैय्याका लागि १८ करोड बजेट छुट्याएको थियो । ३९६ आधारभूत अस्पताल निर्माण दुई वर्षमा सक्ने लक्ष्यका साथ ५८ अर्ब ८० करोड बजेट बिनियोजन गरिएको थियो ।

हालसम्म आधारभूत अस्पताल निर्माणका लागि स्थानीय तहहरुले १६ अर्ब ६१ करोड बढी भुक्तानी लगिसकेका छन् ।


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ