चरिकोट—सरकारी अस्पतालले शुल्क निर्धारण गरेपछि बिरामीको संख्यामा कमी आएको छ । दोलखाको सदरमुकाम चरिकोटस्थित पशुपति चौलागाई स्मृति अस्पतालमा शुल्क तोकिएको छ ।
आर्थिक संकटको कारण गत १ माघदेखि सबै खालका बिरामीलाई अनिवार्य टिकटलगायत सम्पूर्ण सेवामा शुल्क निर्धारण गरेपछि अहिले बिरामी अन्यत्र जान थालेका हुन् ।
टिकटलगायतका अन्य सेवामा समेत निःशुल्क हुँदा दैनिक डेढ सयदेखि दुई सयसम्म बिरामी उपचार गर्न आउने गरेका थिए । अहिले शुल्क निर्धारणपछि दैनिक ८० जना लगभग आउने गरेका छन् ।
न्याय हेल्थ नामक गैरसरकारी संस्थाले यसअघि पशुपति चौलागाई स्मृति अस्पतालमा सबै खालको उपचार निःशुल्क गरेको थियो । औषधि उपचारलगायत बिरामी र कुरुवालाई समेत निःशुल्क खानाको व्यवस्था गरिएको थियो ।
यसअवधिमा दोलखालगायत छिमेकी जिल्ला रामेछाप, सिन्धुपाल्चोकबाट समेत बिरामी आउने गरेका थिए । अहिले न्याय हेल्थ अस्पतालबाट बाहिरिएपछि कर्मचारीलाई तलब दिनसमेत धौ—धौ परेको अस्पताल सञ्चालक तथा व्यवस्थापन समितिका अध्यक्ष भरत प्रधानले जानकारी दिए ।
अस्पताल सञ्चालन र करारका कर्मचारीलाई तलब दिनको लागि सबै सेवामा शुल्क लिन थालिएको हो । १ माघ २०७९ देखि शुल्क लिने भनिएतापनि नागरिक समाजलगायतले विरोध जनाएपछि केही समय रोकिएको थियो । त्यसपछि शुल्क निर्धारणका लागि कार्यदल बनाइएको छ ।
सो कार्यदलको सिफारिसपछि २ चैत २०७९ देखि लागू हुने गरी पुनः शुल्कमा संशोधनसहित कार्यान्वयनमा ल्याइएको छ । हाल टिकट शुल्क ५० रुपैयाँ, इमर्जेन्सी टिकट १०० रुपैयाँ, जनरल वेड १०० रुपैयाँ र एचडियु वेड ३०० रुपैयाँ शुल्क तोकिएको अस्पतालका सूचना अधिकारी शान्तिप्रसाद न्यौपानेले जानकारी दिए ।
निःशुल्क हुँदा सामान्यदेखि जटिल अपरेशन पनि यस अस्पतालमै गर्दै आएका थिए । अहिले अस्पतालले शुल्क लिन थालेपछि बिरामीहरु नजिकैको निजी अस्पतालमा जान थालेका छन् ।
पशुपति चौलागाई स्मृति अस्पताललाई प्रदेशस्तरीय अस्पतालको रुपमा नामाङ्कन गरेतापनि सरकारले सेवासुविधा दिन सकेको छैन । अस्पतालले पर्याप्त पूर्वाधार अभावका कारण डायलाइसिसको मेसिन त्यत्तिकै थन्केको मेडिकल सुपरिटेन्टडेन्ट डा. ज्ञानेश्वर श्रेष्ठले जानकारी दिए ।
