काठमाडौं—स्वास्थ्य तथा जनसंख्या मन्त्री मोहनबहादुर बस्नेतको विवादास्पद अभिव्यक्तिले संसदमा प्रवेश पाएको छ । शुक्रबार संसदमा बोल्दैं नेकपा एमालेका सांसद ठाकुर गैरेले आत्महत्या प्रोत्साहन गर्ने मान्छे मन्त्री भइरहन मिल्छ भन्दैं प्रश्न गरेका छन् ।
सांसद गैरेले आत्महत्याको प्रवृति बढिरहेका बेला त्यसको समाधानको उपाय निकाल्नुपर्नेमा मन्त्रीले नै आत्महत्या दुत्साहन गर्ने अभिव्यक्ति दिएको बताए । ‘आत्महत्यालाई दुरुत्साहन गर्नुपर्ने, आत्महत्या गर्ने प्रवृति किन विकास भयो भन्ने कुरा खोज अनुसन्धान गरेर त्यसको समाधानको उपाय निकाल्नुपर्ने ठाउँमा सरकार स्वयंमले, मन्त्री स्वयंमले म कहाँ डोरी लिन आउनु, मेरो ढोका अगाडि आत्महत्या गर्नु भन्ने अभिव्यक्तिबाट के बुझ्ने सभामुख महोदय ?,’ उनले भने ।
गैरेले अगाडि थपे, ‘देशले के बुझ्ने, समाजले के बुझ्ने गम्भीर प्रश्न खडा भएको छ । यस्तो अभिव्यक्ति दिने छुट मन्त्रीहरुलाई हुन्छ कि हुँदैन । यस्तो अभिव्यक्ति गर्ने मान्छेहरु मन्त्री भइरहन मिल्छ कि मिल्दैन् ?’
केही दिनअघि स्वास्थ्यमन्त्री बस्नेतले सरुवा गरेको ठाउँमा जान नमानेर आत्महत्या गर्ने धम्की दिने कर्मचारीलाई आफूले डोरी दिने र आफ्नै गेटमा आएर आत्महत्या गर्नु भन्दिनु भनेर स्वास्थ्य सचिवलाई भनेको सार्वजनिक अभिव्यक्ति दिएका थिए । उक्त अभिव्यक्तिको चौतर्फी आलोचना भएपछि मन्त्रालयले बिहीबार विज्ञप्ती जारी गरेर कर्मचारीको मनोबल बढाउन उक्त अभिव्यक्ति दिएको प्रष्टीकरण दिएको थियो ।
सांसद ठाकुर गैरेले संसदमा के भने ?
केही दिन अगाडि ठीक यहिबेला अर्को एउटा आपत्तिजनक अभिव्यक्ति स्वासथ्यमन्त्रीज्यूबाट व्यक्त भएको छ । हामीले सदनमा भनिरहेका छौं किन निजामती कर्मचारी सम्बन्धित ऐन तत्काल संसदबाट पास गरेर कर्मचारीहरुका समस्या समाधान गर्नुपर्छ । कर्मचारीतन्त्रमार्फत देशले पाउनुपर्ने जुन भूमिका हो, त्यो प्रभावकारी नभएको प्रभावकारी बनोस भन्ने कुरा हामीले माग गरिरहेका छौं ।
स्वास्थ्य मन्त्रालयअन्तर्गतका केही कर्मचारीहरु स्वास्थ्य सचिव कहाँ जानुहुन्छ । अपायक सरुवाका कारणले अत्यन्त अप्ठ्यारो प¥यो । त्यो समाधान भएन भने त हामी आत्महत्या गर्न विवश हुनेछौं भन्ने दुःखेसो व्यक्त गर्नुभयो । स्वास्थ्य मन्त्रालयका सचिवले उक्त कुरा मन्त्रीलाई गएर बताउनुभयो । र, मन्त्रीले भनिदिनुभयो इच्छा लागेका व्यक्ति मसँग डोरी लिन आउनु, मेरो ढोका अगाडि आत्महत्या गर्नु । के अब सरकारले समस्याको समाधान आत्महत्यामार्फत गर्न खोजेको हो ?
कोभिड आयो त्यसको समाधान भ्याक्सिनले ग¥यो, लम्पी स्कीन छ, हामीले माग गरिरहेका छौं त्यसको समाधानका लागि भ्याक्सिन । देशमा अनेकन समस्या आउँछन्, त्यसको समाधान खोजिनुपर्छ । किशोर—किशोरीहरु राम्रो रिजल्ट नआएर आत्महत्या गरिरहेका छन् । ऋण तिर्न नसकेर मानिसहरु आत्मदाह गरिरहेका छन्, आत्महत्या गरिरहेका छन् समस्या समाधान गर्न नसकेर, सरकारले ध्यान नदिएर मान्छेहरु आत्महत्या गर्न विवश छन् । ठीक त्यही बेला आत्महत्यालाई दुरुत्साहन गर्नुपर्ने, आत्महत्या गर्ने प्रवृति किन विकास भयो भन्ने कुरा खोज अनुसन्धान गरेर त्यसको समाधानको उपाय निकाल्नुपर्ने ठाउँमा सरकार स्वयंमले, मन्त्री स्वयंमले म कहाँ डोरी लिन आउनु, मेरो ढोका अगाडि आत्महत्या गर्नु भन्ने अभिव्यक्तिबाट के बुझ्ने सभामुख महोदय ?
देशले के बुझ्ने, समाजले के बुझ्ने गम्भीर प्रश्न खडा भएको छ । यस्तो अभिव्यक्ति दिने छुट मन्त्रीहरुलाई हुन्छ कि हुँदैन । यस्तो अभिव्यक्ति गर्ने मान्छेहरु मन्त्री भइरहन मिल्छ कि मिल्दैन् ? हामीले देशका समस्याहरु समाधान गर्ने उपाय खोज्नका लागि सदनबाट निकास निकाल्नु, उपाय खोज्नु, आत्महत्यालाई निरुत्साहित गर्नु त्यसका लागि वातावरण बनाउनुको सट्टा आत्महत्यालाई प्रोत्साहन गर्ने तर्फ जाने तरिका अत्यन्त दुःखद् छ म सभामुखमार्फत सदनमा गम्भीर ध्यानाकर्षण गराउन चाहन्छु ।
