प्रधानमन्त्रीको स्वाथ्य अवस्था सुधारोन्मुख, पानी खाए, गफगाफ पनि गरे

काठमाडौं—प्रधानमन्त्री केपी शर्मा ओलीको स्वास्थ्य अवस्था सुधारोन्मुख रहेको छ । मंगलबार दिनभर निकै गंम्भीर रहेको स्वास्थ्य बुधबारबाट सुधार देखिएको चिकित्सकहरुले बताएका छन् ।

स्वास्थ्य अवस्थालाई मध्यनजर गर्दै जोडिएको भेन्टिलेटर निकालिएको छ । डा. प्रेम ज्ञवालीका अनुसार ओलीले बुधबार बिहान पानी खानेदेखि चिकित्सक र आफन्तसँग गफ पनि गरेका छन् । स्वास्थ्य उत्साहजनक रुपमा सुधार देखिए पनि कम्तिमा दुई दिन वार्डमा नलाने चिकित्सकको निर्णय छ । उनका अनुसार दुई दिनसम्म आईसियुमा राखेर उपचार गरिने छ ।

‘वार्डमा सारेपनि भेटघाटमा मान्छे आउने र संक्रमण हुने सम्भावना देखिएकाले केही दिन आईसीयुमै राखेर उपचार गर्ने निर्णय भएको हो,’ उनले भने । मंगलबार देखिएको संक्रमण निकै कम भएर गएको स्वास्थ्य रिपोर्टले जनाएको छ ।

बुधबार बिहान अस्पतालले पनि एक विज्ञप्ती जारी गर्दै स्वास्थ्य अवस्था राम्रो भएको जनाएको छ । अहिले प्रधानमन्त्री कुराकानी गर्न सक्ने अवस्थामा भएको विज्ञप्तीमा भनिएको छ । मंगलबार बिहान अत्याधिक पेट दुखेपछि ओली मनमोहन कार्डियोथोरासिक तथा ट्रान्सप्लान्ट सेन्टर गएका थिए । स्वास्थ्य परीक्षणमा उनलाई एपेन्डिसाइटीस भएको देखिएपछि तत्काल शल्यक्रिया गरिएको थियो ।