बुटवल—बुटवलस्थित गौतमवुद्ध सामुदायिक स्वास्थ्य संस्थाले दाङको लमहीमा स्थापना गरेको लमही सामुदायिक डायलाइसिस सेन्टरले सेवा शुभारम्भ गरेको छ । रोटरी क्लब अफ सेन्ट्रल बुटवल र रोटरी क्लब अफ लमहीको आर्थिक सहयोगमा स्थापना गरिएको सेन्टरमा १० वटा डायलाइसिस मेसिन जडान गरी सेवा सुरु हो ।
गौतमबुद्ध सामुदायिक मुटु अस्पतालका अध्यक्ष एजाज आलमले करिब ५ करोडको लागतमा स्थापित सेन्टरबाट दैनिक ३० जना बिरामीको नियमित डायलाइसिस गर्न सकिने बताए । हाल तुलसीपुर र घोराही अस्पतालमा दुई—दुई वटा डायलाइसिस मेसिन संचालनमा रहेपनि बिरामीहरुको चाप धेरै भएकोले दाङ, प्युठान, सल्यान, रोल्पा, रुकुमलगायतका क्षेत्रबाट समेत बुटवल, नेपालगञ्ज, काठमाडौंमा डायलाइसीस गर्न जान बाध्य थिए ।
लमही नगरपालिकाका प्रमुख कुलबहादुर केसीले बुटवलमा स्थापित गौतमबुद्ध सामुदायिक स्वास्थ्य संस्थाले लमहीमा संचालन गरेको डायलाइसिस सेन्टरबाट पश्चिम क्षेत्रका बिरामीहरुलाई राहत मिल्ने भन्दै खुशी व्यक्त गरे । उनले सरकारले नागरिकलाई आधारभूत स्वास्थ्य सेवा दिनुपर्नेमा सामुदायिकस्तरबाट संचालित संस्था र अस्पतालले दिएकोप्रति प्रशंसा गरे ।
रोटरी क्लब अफ सेन्ट्रल बुटवलका अध्यक्ष राजेन्द्र कार्कीले स्वास्थ्य सेवाको सहज पहुँच नपुगेका स्थानमा सेवा पु¥याउने उद्देश्यले रोटरीको सहयोगमा लमहीमा डायलाइसिस सेन्टर स्थापना गरिएको बताए । उनले हाल १० वटा मेसिनबाट विरामीहरुको मिर्गौला डायलाइसिस सेवा सुरु गरिएपनि आवश्यकताको आधारमा थप मेसिन समेत जडान गर्न सकिने बताए । रोटरी क्लब अफ लमहीका अध्यक्ष रविलाल आचार्यले डायलाइसिस सेन्टर संचालनकै लागि रोटरी क्लब गठन गरिएको जानकारी दिंदै गौतमबुद्ध सामुदायिक स्वास्थ्य संस्थासँग सहकार्य गर्न पाएकोमा खुशी व्यक्त गरे ।
