कैलालीकी बोहोराले जन्माइन् तिम्ल्याहा छोरा, उपचारमा आर्थिक अभाव

धनगढी-कैलालीकी महिलाले नेपालगन्जमा तिम्ल्याहा शिशु (छोरा) जन्माएकी छन् । डोटीको बड्डीकेदार गाउँपालिका घर भई कैलालीको गौरीगंगा नगरपालिका वडा नम्बर १ चौमाला बस्दै आएकी २२ वर्षीया हेमा बोहोराले गत माघ २८ गते राति नेपालगञ्जको कोहलपुर मेडिकल कलेजमा तिम्ल्याहा छोरा जन्माएकी हुन् ।

उनका श्रीमान नरेश बोहोराले शल्यक्रियामार्फत तीन शिशु जन्मिएको बताए। उनका अनुसार दुई शिशुको तौल दुई÷दुई हजार ग्राम र एकको आठ सय ग्राम छ । दुई शिशुको अवस्था असामान्य रहेपछि चार दिन आईसियुमा राखिएको बोहोराले बताए ।

तर अहिले भने उनीहरुलाई आईसियुबाट निकालिएको छ । उनीहरुको उपचारमा लागेको खर्चको अभाव भएको गुनासो गरिएको छ ।

बोहोराले शल्यक्रिया गरी जन्मिएका शिशु र आमाको उपचारका लागेको पैसा आफूसँग नभएकाले सहयोग गरिदिन आग्रह गरेका छन् । उनले अहिलेसम्म डेढ लाख भन्दा बढी खर्च भएपनि तिर्न नसकिएको बताए ।

प्रसुती व्यथा लागेपछि धनगढीको सेती अस्पताल पुगेकी बोहोरालाई माघ २८ गते नै नेपालगन्ज रेफर गरिएको थियो ।