कोभिड-१९ भाइरसबाट तपाईको शरीरका धेरै अंगहरू प्रभावित हुनसक्छ। विशेषगरी तपाइको मुटु। अमेरिकामा गरिएको एउटा नयाँ अनुसन्धानले संक्रमणबाट निको भइसकेपछि पनि बिरामीलाई हृदयाघात, स्ट्रोक र हृदयघातको जोखिम हुने दावी गरेको छ ।
यो जोखिम रोगको कुनै लक्षण नदेखिएका मानिसहरूमा पनि हुन्छ।
युनिभर्सिटी अफ वासिङ्टनका वैज्ञानिकहरूले एक वर्षभन्दा बढी समयसम्म कोभिडबाट पीडित १ लाख ५३ हजार ७६० व्यक्तिको स्वास्थ्य ट्र्याक गरेका छन् । यो तथ्यांकको तुलना ५६ लाखभन्दा बढी त्यस्ता मानिससँग गरिएको थियो जो संक्रमित भएका थिएनन्।
वैज्ञानिकहरुले संक्रमण भएको ३० दिनभित्र निको भएका बिरामीहरुमा हार्ट स्ट्रोकको जोखिम १.५ गुणा बढी रहेको पत्ता लगाएका छन् । यसबाहेक, हृदयघातको जोखिम १.६ गुणाले र हार्ट फेलियरको जोखिम १.७ गुणाले बढेको छ। यसबाहेक यस्ता बिरामीमा मुटुको धड्कन अनियमित हुने जोखिम १.६ गुणा र मुटुमा सुजन हुने जोखिम दोब्बर हुने देखिएको विज्ञले उल्लेख गरेका छन् ।
कोभिडबाट पीडित व्यक्तिहरूमा डीप भेन थ्रोम्बोसिसको जोखिम पनि दोब्बर हुन्छ। यो एक जटिल अवस्था हो जसमा शरीरको नसाहरूमा रगत जम्मा हुन्छ। यसले मुटुको नसालाई पनि ब्लक गर्न सक्छ।
धेरै अनुसन्धानले कोभिडको समयमा मानिसलाई मुटु रोगको जोखिममा रहेको देखाएको छ। तर, यो पहिलो अनुसन्धान हो जसले कोभिड निको भएका बिरामीमा यी रोगहरूको जोखिम देखाउँछ। अनुसन्धानमा हृदय रोगको जोखिम सबै उमेर र लिङ्गका व्यक्तिहरूमा समान पाइयो। मोटोपना, मधुमेह, उच्च रक्तचाप, उच्च कोलेस्ट्रोल र मृगौला रोगका बिरामीलाई पनि कोभिड निको भएपछि मुटुसम्बन्धी रोगको उत्तिकै जोखिम रहेको पाइएको थियो ।
अनुसन्धानका अनुसार यदि तपाई संक्रमित हुनुहुन्छ भने तपाई सधै मुटु रोगको जोखिममा रहनुहुनेछ । यद्यपि, यो जोखिम उच्च वा कम हुनेछ, यो संक्रमणको गम्भीरतामा निर्भर गर्दछ। यदि तपाईमा कोभिडको हल्का वा कुनै लक्षण थिएन भने तपाईलाई हृदय रोगको कम जोखिम छ। तर, यदि तपाई संक्रमणका कारण आईसीयूमा भर्ना हुनुभएको थियो भने तपाई यी रोगहरुको उच्च जोखिममा हुनुहुन्छ ।
कोभिडले मुटु रोगको जोखिम किन बढाउँछ भन्ने कुराको वैज्ञानिकहरुले अहिलेसम्म ठोस कारण दिन सकेका छैनन् । उनीहरुका अनुसार भाइरसले मुटुको मांसपेशीका कोषिकाहरुलाई नोक्सान पुर्याउँछ, जसले गर्दा यस्ता समस्या हुन सक्छन्। यसबाहेक, यो समस्या अत्याधिक सक्रिय प्रतिरक्षा प्रणाली र मुटुमा सूजनका कारण पनि हुन सक्छ।
हालसम्म विश्वमा ४० करोडभन्दा बढी मानिस कोभिड-१९ बाट संक्रमित भएका छन् ।
–एजेन्सी
