काठमाडौं—नेपाली सेनाको नेतृत्वमा हिमाल सरसफाइ अभियान संचालन भएको छ । सेनाको नेतृत्व भएको उक्त अभियानमा सगरमाथा, ल्होत्से, अन्नपूर्ण र बरुन्चे हिमालबाट ३५ हजार ७०८ किलो फोहोर संकलन गरेर हटाइएको छ ।
हिमालहरूबाट फोहोर र प्लास्टिकको सरसफाइ गर्ने र हटाउने ‘सफा हिमाल अभियान २०२३’ अन्तर्गत उक्त कार्य सम्पन्न भएको हो । ८ जेठ २०८० मा फोहोर संकलन कार्य सम्पन्न भएको छ । अभियानले यी हिमालहरूबाट ३५ टन फोहोर र प्लास्टिक हटाउने लक्ष्य राखेकोमा उक्त लक्ष्य पूरा गरेको हो ।
१४ चैतबाट उक्त अभियानमार्फत नेपाली सेनाले युनिलिभर नेपालसँगको सहकार्यमा सगरमाथा, ल्होत्से, अन्नपूर्ण र बरुञ्चे हिमालबाट स्थानीयवासी र स्वयंसेवकहरुको सहयोगमा ३५ हजार ७०८ केजी फोहोर संकलन गरेको थियो ।
अभियानमा सगरमाथा–ल्होत्से क्षेत्रबाट १३ हजार ६२१ किलो फोहोर र प्लास्टिक सङ्कलन गर्न सफल भएको थियो भने अन्नपूर्णबाट ३ हजार ५६७ किलो र बरुञ्चेबाट १८ हजार ५२० केजी फोहोर संकलन गरिएको थिाये । उक्त फोहोर ती क्षेत्रबाट हटाइएको युनिलिभर नेपालले जनाएको छ ।
कार्यक्रममा युनिलिभर नेपालका प्रबन्ध निर्देशक अमलान मुखर्जीले युनिलिभर नेपालले नेपालको सेवा गर्न पाउँदा गर्व महसुस गरेको र नेपाली सेनासँगको यस सहकार्यको प्रयासमा सहभागी हुन पाउँदा र दिगोपनका यी स्थायीत्व पहलहरूमा धेरै अन्य समर्थकहरूको साथमा चेतना जगाउन पाउँदा कम्पनीले सम्मानित महसुस गरेको बताए ।
जलवायु परिवर्तनको प्रभावलाई न्यूनीकरण गर्ने र यी महत्वपूर्ण हिम चुचुराहरूको मौलिक प्रकृतिलाई जोगाउने प्रयासलाई यो अभियानहरूद्वारा बढावा दिएको छ । वातावरणमा सुधार पार्ने यस्ता प्रयासहरूलाई समर्थन र कदर गर्नुपर्ने विश्वास युनिलिभरको छ ।
