फरक ग्रुपको रगत चढाउँदा रामजानकी अस्पतालमा सुत्केरीको मृत्यु, डाक्टर फरार

जनकपुर –  धनुषाको जनकपुरधाम उपमहानगरपालिका ६ स्थित राम जानकी अस्पतालमा डाक्टर र रेडक्रसको लापरवाहीले प्रसुती गराउन आएकी एक महिलाको मृत्यु भएको छ ।  फरक ‘ब्लड ग्रुप’को रगत चढाएपछि महोत्तरीको गौशाला घर भएकी २२ वर्षीया गंगादेवी महतोको शुक्रबार विहान अस्पतालमा मृत्यु भएको हो ।

मृतकका आफन्त रामहरी महतोले रेडक्रस र डाक्टर दुबैको लापरवाही देखिएको बताएका छन् । उनका अनुसार अप्रेशन गरेर प्रसुती गराए पछि उक्त महिलाको स्वास्थ्य अवस्था बिग्रिएको थियो ।

डाक्टरले ब्लड चढाउनुपर्छ भनेपछि आफन्तले स्याम्पल लिएर रेडक्रसमा गएर ब्लड ल्याएको र रेडक्रसले अर्कै ग्रुपको रगत दिएपछि डाक्टरले सोहि  रगत चढाएर सुत्केरी महिलाको मृत्यु  भएको बुझिएको छ ।

 महतोले डाक्टर र रेडक्रसका कर्मचारीलाई कारवाही गर्न माग गरेका छन् । त्यस्तै , हाल अस्पतालका डाक्टरहरु भने  फरार भएका छन् ।