काठमाडौं—कैलालीको धनगढीस्थित निसर्ग अस्पतालले मानवीय सेवाको उदाहरण प्रस्तुत गर्दै एक बिरामीको ३१ लाख ५७ हजार रुपैयाँभन्दा बढी उपचार खर्च मिनाहा गरेको छ । बिहीबार अस्पतालले डडेल्धुराकी बन्दना लिम्बुको उपचारका लागेको उक्त खर्च छुट दिएको जानकारी दिएको हो ।
बन्दना साइकल सिक्ने क्रममा भएको दुर्घटनामा गम्भीर घाइते भएपछि उनलाई करिब २३ महिनासम्म निसर्ग अस्पतालमा उपचार गरिएको थियो ।
अस्पतालका मेडिकल निर्देशक डा. मिराज आलम अन्सारीका अनुसार उपचारका क्रममा गरिएको दुई वटा जटिल न्युरो सर्जरी, विभिन्न स्वास्थ्य परीक्षण, औषधि तथा अन्य उपचार सेवाको अधिकांश खर्च अस्पतालले नै व्यहोरेको हो ।
डा. अन्सारीकाअनुसार बिरामी पक्षले सहयोगमार्फत जुटेको केही रकम मात्र भुक्तानी गरेको र बाँकी ३१ लाख ५७ हजार रुपैयाँ अस्पतालले सामाजिक उत्तरदायित्वअन्तर्गत छुट दिएको हो ।
अस्पतालको यो कदमलाई आर्थिक अभावका कारण उपचारबाट वञ्चित हुन सक्ने बिरामीप्रति गरिएको महत्वपूर्ण मानवीय सहयोगका रूपमा हेरिएको छ ।
