नेपाल स्वास्थ्य अनुसन्धान परिषद् प्रदेश ५ को संयोजकमा डा. आचार्य

बुटवल– नेपाल स्वास्थ्य अनुसन्धान परिषद् प्रदेश ५ कोे संयोजकको जिम्मेवारी लुम्बिनी प्रादेशिक अस्पतालका डा. प्रशान्त आचार्यले पाएका छन् । डा.आचार्य प्रदेश सरकार र स्थानीय तहहरुबीच समन्वयतात्मक भूमिका खेल्ने जिम्मेवारीसहित संयोजक चयन भएका हुन् ।

परिषद्ले मंगलवार आचार्यलाई प्रदेश संयोजकको जिम्मेवारी तोकेको हो । यो सँगै स्वास्थ्य क्षेत्रमा संघियताको विकास र विस्तार हुने गरी संस्थागत संरचना तयार भएको बताइएको छ ।

नेपाल स्वास्थ्य अनुसन्धान परिषद् रणनीति २०७६ बमोजिम स्वास्थ्य अनुसन्धान प्रणालीको संस्थागत संरचना जनशक्ति पुर्वाधार क्षमता प्राथमिकताका आधारमा संघ, प्रदेश र स्थानीय तहसम्म परिषद्को संरचना विस्तार गरिने परिषद्का सदस्य सचिव डा. प्रदिप ज्ञवालीले बताए । यसैगरी प्रत्येक प्रदेशमा परिषद्का शाखाहरु विस्तार हुने उनले बताए ।

चालू आर्थिक बर्षको बजेटमा समेत हरेक प्रदेशमा परिषद्को शाखा विस्तार गर्ने भनिएको थियो । परिषद्ले प्रदेश र स्थानीय तहका गतिविधी समेतको रिपोर्ट परिषद्लाई उपलब्ध गराउनेछ ।