नेपालगन्ज—वरिष्ठ बालरोग विशेषज्ञ डा. दुर्गा प्रधानको निधन भएको छ । शुक्रबार दिउँसो २ बजे उपचारका क्रममा उनको वेष्टर्न अस्पताल नेपालगन्जमा निधन भएको हो ।
सल्यान खलंगामा वि.सं. २००२ सालमा जन्मिएका डा. प्रधान भेरी अस्पताल नेपालगन्जका प्रमुख भएर समेत काम गरेका थिए । आफ्नो करियरको २४ नेपालगन्जको भेरी अस्पतालमा बिताएका डा. प्रधानका श्रीमती र तीन छोरा छन् ।
सेवा निवृत्त भएपछि भने उनले नेपालगन्जमा त्रिपुरा बाल अस्पताल संचालन गरेर बालबालिकाको उपचार सेवा दिँदै आएका थिए। वरिष्ठ बालरोग विशेषज्ञ डा. प्रधानले यसक्षेत्रका लाखौं बालबालिकाको उपचार गरेका छन् ।
स्वास्थ्यमा समस्या देखिएपछि डा. प्रधान गएको ४ भदौंदेखि नेपालगन्जस्थित वेष्टर्न अस्पतालमा उपचारका लागि भर्ना भएका थिए । उनी लामो समयदेखि सुगरको समस्याले ग्रसित तिए । डा. प्रधान पछिल्ला दिनहरूमा फोक्सोको टिबी, कलेजो र मिर्गौलाको समस्या लगायतले ग्रस्त थिए ।
यसक्षेत्रका चिकित्सकहरुका अभिभावक समेत रहेका डा. प्रधानको निधनले स्वास्थ्य क्षेत्रमा अपुरणीय क्षति पुगेको छ । डा. प्रधानको पार्थिव शरीरलाई अन्त्येष्टीका लागि शुक्रबार नै काठमाडौं लगिदैंछ ।
