कोरोना संक्रमित नगर प्रहरीको मृत्यु

विराटनगर- विराटनगर महानगरपालिकाकामा कार्यरत नगर प्रहरी हवल्दारको कोरोना संक्रमणबाट शनिबार विहान मृत्यु भएको छ ।

विराटनगर – ३ पुष्पलालचोक घर भएका ५७ वर्षीय नगर प्रहरी हवल्दार सुर्यबहादुर घिमिरेको उपचारको क्रममा नोबेल अस्पतालमा साढे ५ः४५ बजे मृत्यु भएको हो ।

पाँच दिन अघि कोरोना पुष्टि भएर स्वासप्रश्वासमा समस्या भएपछि शुक्रबार बेलुका अस्पताल भर्ना भएका थिए । श्वासप्रश्वासमा समस्या भएपछि नोबेल अस्पतालको आईसीयुमा राखेर उपचारको क्रममा घिमिरेको मृत्यु भएको नोबेल अस्पतालका प्रबन्धक नारायण दाहालले जानकारी दिए ।

हवल्दार घिमिरे १७ बर्षदेखि नगर प्रहरीमा कार्यरत थिए । नगर प्रहरी घिमिरेका दुई छोरा र श्रीमती रहेका छन् ।