कोशी प्रदेशकी स्वास्थ्यमन्त्री निर्मला लिम्बुले दिइन् राजीनामा

विराटनगर—कोशी प्रदेशको स्वास्थ्यमन्त्री बनेकी निर्मला तावा लिम्बूले राजीनामा दिएकी छिन् । बुधबार विराटनगरमा पत्रकार सम्मेलन गरेर मन्त्री लिम्बुले राजीनामा दिएको जानकारी दिएकी हुन् ।

उनी जनता समाजवादी पार्टी (जसपा)बाट वर्तमान गठबन्धन सरकारमा स्वास्थ्यमन्त्री थिइन् ।

जसपाको प्रदेश समितिको बैठकले वर्तमान मुख्यमन्त्री हिक्मतकुमार कार्की नेतृत्वको सरकारलाई दिएको समर्थन फिर्ता लिने निर्णय गरेको थियो । सोही बैठकले मन्त्री लिम्बुलाई सरकारबाट फिर्ता आउन आग्रह गरेको थियो ।

पार्टीको निर्णयलाई आफूले मान्ने भन्दै उनले राजीनामा दिएकी हुन् । पहिचानको मागप्रति सरकारलाई गम्भीर भएर वार्ता र संवादमार्फत समस्याको सामाधान गर्न प्रस्ताव राख्दा समेत बेवास्ता भएको हुँदा नैतिकताको आधारमा प्रदेश सरकारलाई दिएको समर्थन फिर्ता लिएको उनले जानकारी दिइन् ।

‘यस प्रदेशको स्वास्थ्यमन्त्रीबाट समेत राजीनामा दिएकी छु,’ उनले भनिन् ।