प्रदेश २ मा थप ८ जनामा कोरोना पुष्टि

जनकपुर – प्रदेश २ मा थप ८ जनामा कोरोना पुष्टि भएको छ । बिहिबार बाराको आदर्श कोतवाल गाउँपालिकाको क्वारेन्टाइनमा  बस्दै आएकी एक महिला र ६ जना पुरुष सहित ७ जनामा कोरोना संक्रमण पुष्टि भएको गाउँपालिकाका स्वास्थ्य संयोजक पारस यादवले जानकारी दिएका हुन् ।

संयोजक यादवकाअनुसार उनीहरु सातै जनामा हेटौँडास्थित प्रयोगशालामा गरिएको परीक्षणमा संक्रमण पुष्टि भएको छ । संक्रमितहरु भरतबाट १० दिन अघि फर्किएका सातै जना गाउँपालिकाको वडा नम्बर १ स्थित विद्यालयमा बनाइएको क्वारेन्टिनमा बस्दै आएका थिए । क्वारेन्टिनमा बस्दै आएका ५४ जनाको जेठ १९ गते स्वाब संकलन गरी पीसीआर परीक्षणको लागि हेटौँडा स्थित प्रयोगशालामा पठाइएकोमा ७ जनाको रिपोर्ट पोजेटिभ आएको यादवले बताए ।

त्यस्तै, पर्साको पोखरिया नगरपालिका वडा नम्बर ६ की १५ वर्षकी किशोरीमा पनि कोरोना संक्रमण देखिएको नारायणी अस्पतालका मेडिकल सुपरिटेन्डेन्ट डा. मदन उपाध्यायले बताए । किशोरीमा उनको बुबाबाट नै कोरोना सरेको पाइएको छ ।

गत जेठ ६ गते भारतबाट फर्केर आएका ती किशोरीका बुवालाई पनि कोरोना संक्रमण भएको थियो । योसँगै प्रदेश २ मा कोरोना संक्रमितको संख्या ८ सय ६७ पुगेको छ ।