कोरोना अस्पतालमा मृत्यु भएका २४ वर्षीय युवामा कोरोना नेगेटिभ

बुटवल—कोरोना विशेष अस्पताल बुटवलमा उपचारका क्रममा मृत्यु भएका एक जनामा कोरोना संक्रमण नभएको पुष्टि भएको छ । कपिलवस्तुका २४ वर्षीय प्रदीप तेलीको कोराना विशेष अस्पतालमा उपचारको क्रममा मंगलबार राती मृत्यु भएको थियो ।

मृतक तेलीको स्वाव परीक्षणमा कोरोना संक्रमण नेगेटिभ देखिएको अस्पतालका मेडिकल सुपरिटेन्डेन्ट डा. राजेन्द्र खनालले जनाकारी दिए । उनकाअनुसार तेलीलाई मिर्गौलामा समस्या थियो ।

मृतक तेली यही साउन २४ गते भारतको मुम्बईबाट घर आएका थिए । भारतबाट आउँदा नै ज्वरो र रुघाखोकी देखिएपछि उनले स्थानीय अस्पतालमा उपचार गराएका थिए ।

श्वासप्रश्वासमा समस्या देखिनुका साथै कोरोनासँग मिल्दोजुल्दो लक्षण भएपछि उनलाई कोरोना अस्थायी अस्पतालको भेन्टिलेटरमा राखेर उपचार थालिएको थियो । तेलीसहित कपिलवस्तुका २ जनाको उपचार गर्दागर्दै मंगलबार राति मृत्यु भएको थियो ।