नेमकिपाका सिरहाका उपाध्यक्ष सिंहको कोरोना संक्रमणबाट मृत्यु

जनकपुर – नेपाल मजदुर किसान पार्टीका सिरहा जिल्ला उपाध्यक्षको कोशी अस्पताल विराटनगरमा कोरोना संक्रमणबाट मृत्यु भएको छ । उपचारको क्रममा सिरहाको विष्णुपुर गाउँपालिका १ का ४० वर्षिय संजिव सिंहको गएराती मृत्यु भएको हो ।

निमोनिया र श्वासप्रश्वासमा समस्या भएपछि उपचारका लागि विराटनगर गएका थिए । उपचारको क्रममा सिंहको मृत्यु भएको विष्णुपुर गाउँपालिकाका प्रमुख प्रशासकीय अधिकृत कमलदेव यादवले बताए ।

उपचारकै क्रममा रहेका सिंहलाई कोरोनाको लक्षण देखिएपछि बिहीबार दिउँसो ११ बजे स्वाब संकलन गरि परीक्षणको लागि पठाएको थियो । प्रदेश जनस्वास्थ्य ल्याबमा गरिएको परीक्षणमा ७ बजे कोरोना पोजेटिभ आएको अधिकृत यादवले बताए ।

सिंहको मृत्यूपछि गृह नगरमा विष्णुपुर गाउँपालिकामा आज विहान ४ बजेदेखि साँझ ५ बजेसम्मका लागि निषेधाज्ञा जारी गरिएको अधिकृत यादवले बताए ।मृतकको सम्पर्कका सबै व्यक्तिको पिसिआर परीक्षण गरिने अधिकृत यादबले वताए । मृतक सिंहको शव व्यवस्थापन नेपाली सेनाले गर्ने बताए ।