विराटनगरमा निःशुल्क डायलाइसिस सेवा

विराटनगर – विराटनगरमा निःशूल्क डायलाइसिस सेवा सञ्चालनमा आउने भएको छ । भदौ पहिलो सातादेखि लायन्स क्लब अफ विराटनगर मोरङ र हेल्थ प्रोफेसनलले संयुक्त रुपमा सो सेवा सञ्चालनमा ल्याउने भएको हो ।

सेवा सञ्चालनका निम्त्ति सोमबार विराटनगर–२ स्थित मोरङ सहकारी अस्पतालको नवनिर्मित भवनमा हेमो डायलिसिस सेन्टरको उद्घाटन गरिएको छ । लायन्स क्लबका तत्कालिन गर्भनर टंक श्रेष्ठ र ग्लोबल एक्सन टीमका संयोजक खगेन्द्र सिटौलाले संयुक्त रुपमा हेमो डायलाइसिस सेन्टरको उद्घाटन गरे ।

निःशूल्क सेवा सञ्चालनका निम्त्ति लायन्स क्लब अफ विराटनगर मोरङ र हेल्थ प्रोफेसनल तथा अन्तर्राष्ट्रिय लायन्सले संयुक्त रुपमा १ करोड ६५ लाख मुल्यको ७ वटा डायलिसिस मेसिन खरिद गरेको लायन्स मोरङ हेमो डायलिसिस सेन्टरका प्रोजेक्ट म्यानेजर विकास अधिकारीले बताए । मेसिन खरिदका लागि अन्तर्राष्ट्रिय लायन्सले १ करोड १५ लाख सहयोग गरेको उनले जानकारी दिए ।

सेवा सञ्चालनमा आएपछि भने दैनिक २१ जनाको निःशूल्क डायलाइसिस  हुने लायन्स क्लबले जनाएको छ ।