उपचारका क्रममा जुम्लामा एक कैदीको मृत्यु

जुम्ला—जुम्ला कारागारमा एक कैदीको मुत्यु भएको छ । आइतबार खत्याड गाउँपालिका–३ मुगुका ३४ वर्षीय प्रदीप टमटाको मृत्यु भएको हो ।
ह्रदयघातका कारण कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा मृत्यु भएको जेलर जयाप्रसाद पाण्डेले बताए ।

उनले भने, ‘आइतबार विहानै व्याडमिण्टन खेल खेलिसकेपछि खाना खानु अघि छाती दुख्यो भनेर कारागारको खल्लीमा ढलेका हुन् ।’

उनकाअनुसार कारागारबाट उपचार गर्न अस्पताल अस्पताल पु¥याएको दुई घण्टापछि मृत्यु घोषणा भएको जेलर पाण्डेले बताए । ‘मृतक टमटाका आफन्त नेपालगंज र मुगु जिल्लाबाट जुम्ला आउदै छन्’ उनले भने, ‘साउन २१ गते शव पठाउने तयारी गरिएको छ ।’ मृतक टमटाकी पत्नीसहित एक छोरी र दुई छोरा रहेका छन् ।

उच्च अदालत सुर्खेत जुम्ला इज्लासले बलात्कार घटनामा पाँच वर्ष कैद तोकेको थियो । उनी ०७९ साउन २७ गते जुम्ला कारागारमा आएका हुन् । तीन वर्ष जति कैद भुक्तान गरिसकेका थिए । उच्च र जिल्ला अदालतले उनलाई दोषी ठहराएको थियो ।