काठमाडौं—स्वास्थ्य तथा खाद्य स्वच्छतामन्त्री निशा मेहताले ट्रमा सेवालाई देशभर विस्तार गर्ने योजना रहेको बताएकी छन् । शुक्रबार ट्रमा दिवसका अवसरमा आयोजित कार्यक्रममा मन्त्री मेहताले गुणस्तरीय उपचार उपलब्ध गराउन देशका विभिन्न स्थानमा ट्रमा सेन्टर विस्तार गर्ने बताइन् ।
‘दुर्घटनामा परेका नागरिकलाई समयमै गुणस्तरीय उपचार उपलब्ध गराउन देशका विभिन्न स्थानमा ट्रमा सेन्टर विस्तार गर्ने र उपचारपछि सामान्य जीवनमा फर्किन सहयोग पुर्याउन पुनःस्थापना केन्द्र निर्माण गर्ने काम अघि बढाइएको छ,’ उनले भनिन् ।
उनले काठमाडौंमा मात्र नभई देशका विभिन्न भूभागका नागरिकले पनि समयमै आकस्मिक स्वास्थ्य सेवा पाउने व्यवस्था गर्न सरकारले ट्रमा उपचार सेवाको पहुँच विस्तार गरिरहेको जानकारी दिइन् ।
मन्त्री मेहताले भनिन्, ‘दुर्घटनापछि घाइतेको जीवनरक्षा गर्न समयमै उद्धार, घटनास्थलमै प्राथमिक उपचार, शीघ्र अस्पताल पुर्याउने व्यवस्था र गुणस्तरीय आकस्मिक उपचारको महत्त्वपूर्ण भूमिका रहन्छ ।’
सडक सुरक्षा, ट्राफिक नियमको पालना, हेल्मेट तथा सिटबेल्टको अनिवार्य प्रयोग र मादक पदार्थ सेवन गरेर सवारी नचलाउने विषयमा जनचेतना अभिवृद्धि गर्नुपर्ने मन्त्री मेहताको भनाइ थियो ।
