घाइते, द्वन्द्वपीडित र सहिद परिवारको नि:शुल्क स्वास्थ्य बिमा

पोखरा – कास्की जिल्लाको रुपा गाउँपालिकाले द्वन्द्व पीडित र घाइते  र सहिद परिवारहरुको नि:शुल्क स्वास्थ्य बिमा गरेको छ । सहिद परिवार, घाइते र द्वन्द्व पीडित परिवारको योगदानका कारण नै अहिलेको तीन तहको सरकार बनेको बताउँदै सम्मान र बिमा गरिएको रुपा गाउँपालिका अध्यक्ष नवराज ओझाले बताए ।

उनका अनुसार स्वास्थ्य बिमा शुल्क प्रति परिवार ३५ सय रुपैयाँ गाउँपालिकाले तिरिदिनेछ । गाउँपालिकाभित्रका सहिद परिवार, द्वन्द्वपीडित, घाइते परिवारको संख्या ६१ रहेको अध्यक्ष ओझाले जानकरी दिए ।

उक्त स्वास्थ्य बिमा कार्यक्रममा एक परिवारका पाँच जनासम्मको स्वास्थ्य बिमा समावेश छ । उक्त बिमा योजनाबाट बिमित परिवारले एक लाख रुपैयाँसम्मको स्वास्थ्य सेवा लिन सक्ने उनको भनाइ छ । अघिल्लो वर्ष नै तय भएको कार्यक्रम कोरोनाका कारण करिब एक वर्ष पछि सरेको अध्यक्ष ओझाले प्रष्ट्याए ।