पोखरा-बागलुङको बागलुङ नगरपालिका-५ की ३६ वर्षीया एक महिलालाई लामो समयदेखि पाठेघरसम्बन्धी समस्याले सताइरह्यो । औषधी खाएर निको होला कि सोचेकी उनमा समस्या समाधान हुन त परै जाओस् झन् समस्याले बल्झिन थाल्यो ।
उनलाई पाठेघरबाट रगत बग्ने समस्या झन् जटिल बन्न थाल्यो । धेरै नै औषधी खाइरहिन् तर निको भएन् । उनी धौलागिरी अञ्चल अस्पताल पुगिन् । अस्पतालका चिकित्सकलाई पनि पाठेघरसम्बन्धी त्यस किसिमको समस्याको शल्यक्रिया गरी गरिने उपचार पहिलो नै थियो । उपचार गर्न पेट चिरेर शल्यक्रिया गरी पाठेघर निकालेर फ्याक्नेबाहेक विकल्प भएन ।
चिकित्सकले शल्यक्रियामार्फत उपचार गर्न सुझाएपछि उनको गत ३० कात्तिकमा शल्यक्रिया गरिएको थियो । स्त्रीरोग विशेषज्ञ डा. केशव आचार्यको नेतृत्वमा एनेस्थेसियोलोजिस्ट डा. नवीन पौडेल, वरिष्ठ अस्पताल नर्सिङ निरीक्षक देवी भट्टराई र एनेस्थेसियोलोजिस्ट एसिस्टेन्ट अनिल यादवलगायतको टोलीले उनको शल्यक्रिया गरेको हो । अस्पतालले पहिलो पटक पेट चिरेर पाठेघर फाल्ने शल्यक्रिया गरिएको र सफल भएको जनाएको छ ।
धेरै रगत बगेको तथा पाठेघरमा मासु पलाएको अवस्थामा यसप्रकारको शल्यक्रिया गर्नुपर्ने नर्सिङ निरीक्षक भट्टराईले बताइन् । उनका अनुसार यसअघि पाठेघर निकाल्ने फरक किसिमको शल्यक्रिया भने भइरहेका थिए ।
सफल शल्यक्रियापछि अस्पतालले बिरामीलाई डिस्चार्ज गरेको छ । अहिले उनको स्वास्थ्य अवस्था सामान्य रहेको नर्सिङ निरीक्षक भट्टराईले बताइन् । बिरामीले व्यक्तिगत स्वास्थ्यमा ध्यान दिने, गह्रौ भारी नउचाल्ने जस्ता सावधानी अपनाउन जरुरी हुने र त्यसो नभए इन्फेक्सनको जोखिम रहने उनी बताउँछिन् ।
